Monday, May 24, 2010

Gerascophobia





اليوم الرابع و العشرون


***


أكتوبر 2010 هاكمل 29 سنة
يعني خلاص قربت من الـ 30 بشكل مرعب
مش عارفة ليه كل ما بفكر في موضوع الـ 30 سنة ده بحس إني خايفة
بحس إني عايزة أصرخ و أقول و الله أنا لسه صغيرة
لسه حاسة إني صغيرة
لسه بحب أفلام الكارتون و أغاني الأطفال و اللعب و الألوان و البالونات
لسه بحب أخرج و أتفسح و أقابل أصحابي و آكل أيس كريم و أجري في الشارع
لسه بحب القطط الصغيرة و بحب أرقص تحت المطر
لسه بحب آكل جيلي الفراولة و بفرح لما لساني بيبقى لونه أحمر
مش قادرة أفهم ليه حاسة إني لما هاوصل للـ 30 مش هاعمل كل الحاجات دي
بس حاسة إني لما هاصحى من النوم بعد ما أعدي الـ 30 هابقى إنسانه تانية لدرجة إني حاسة إن حتى ملامحي هاتتغير
طول عمري كنت بفتكر إن الـ 30 دي حاجة بعيدة
بعيدة قوي
و إن الستات اللي عندهم 30 سنة شكلهم غير البنات الصغيرين
مش عارفة شكلهم مختلف إزاي بس هو مختلف و خلاص
حاسة إن الـ 30 هاتكسر من قلبي حته أو إنها هاتاخدني من دنيتي لدنيا تانية مليانة ستات عواجيز بطرح سودا
خايفة
حاسة إني يوم ما هاكمل الـ 30 حته في قلبي هاتتكسر و تتفتت و هاتروح مني خالص 
أو ربما طرحة سودا كبيرة هاتلف على قلبي و تخنقه
مش عارفة و مش عارفة أعرف غير إني خايفة قوي
و المشكلة اللي مزودة خوفي إني عارفة إن مفيش مهرب من الـ 30 غير الموت
خوف
خوف
خوف مفيش أمان يقدر عليه
خوف غير مبرر من شئ لا يمكن التحكم فيه
فوبيا









1 comment:

Killua said...

انجوي كوابيسك عن سن ال30 براحتك ياقطقوط
لان حضرتك مش هتقدري تعيشي ولا كابوس من دول على ارض الواقع ان شاء الله طول ما انتي تعرفينا يا حبيبتي;D
وافتكري جملة جايكوب الخااالده
age is just a number;)
وعقبال ماتبقي 45679 سنة ولسه بنوته صغننونه زي ما انتي^^
وماتفكرنيش بكوابيسي اللي بعيشها من دلوقتي وبحاول اشيلها من دماغي عن سن ال20 :'(