Thursday, May 6, 2010

الساحرة الشريرة




اليوم السادس 

*** 

بقالي كام يوم بسمع الأغنية دي بشكل مش طبيعي 
مش فكرة إنها لما بتخلص بعيدها .. الفكرة إني سايباها مستمرة بدون توقف .. بدون فواصل
أغنية إنت فين لياسمين حمدان عضوة فريق الصابون يقتل 
انطباعي عن ياسمين كان مختلف قوي
حسيت إنها زي الساحرة الشريرة أو النداهة اللي كانوا بيحذرونا منها و إحنا صغيرين
زي عرايس البحر اللي بيستدرجوا البحارة بصوتهم و بعد كده يلتهموهم
صوتها غامض
غريب 
مثير
عميق
و الموسيقى كأنها جاية من أعماق غابة أو بحر
كأنها نذير من قلب الحجيم ذاته
و صوت ياسمين بياخدني للعمق
و الموسيقى بتنبض في وداني كأنها دقات قلب
و ملامح ياسمين برية و متوحشة و لا تقاوم 
العيون العربية السودة الواسعة .. الشعر الإسود الثائر المجنون 
و النظرة الحادة اللي تخليك واقف مكانك مش قادر تتحرك و هي بتسأل إنت فين و الحب فين 
تأكيدها الحاد العنيف على مخارج الحروف و هو بتؤكد إن قلبها في إيدها .. خانق إيدها
مين يقدر يقاوم الساحرة الشريرة ؟
مين يقدر يقاوم النداهة ؟
مين يقدر يقاوم عروسة البحر ؟
مين يقدر يقاوم ياسمين حمدان و موسيقى فريق الصابون يقتل ذو الاسم العبثي المجنون ؟ 
مين يقدر ؟ 

No comments: