Friday, January 23, 2009

كتاب لولو

لولو صحبتى .. بقت الأستاذة علياء بسيونى الكاتبة
أنا سعيدة جدا للخطوة دى فى حياتك يا علياء
فخورة بيكى قوى
فخورة بكتابك ده قوى
ربنا يبارك لى فيكى و يوفقك دايما فى كل خطواتك
من نجاح لنجاح و من تقدم لتقدم

Thursday, January 15, 2009

تاج .. السعادة

هاملا الدنيا بلالين ملونة و أفكر فى حاجات حلوة و جميلة
هافكر فى كل الناس اللى حوالي و بيحبوني
هافكر فى شروق الشمس و فى العصافير الملونة و الشيكولاتة بالبندق
هافكر فى إيهاب و فى عيلتى و أصحابى
هافكر فى معرض الكتاب اللى جاى و كل ذكرياتى الحلوة فيه
هافكر فى والت ديزنى و أفلامه و الحكمة اللى ربنا خلقه عشانها
هافكر فى هانز كريستيان أندرسون و أميراته و فرسانهم و كل الجنيات الطيبين
هافكر فى صوت فيروز و على الحجار و محمد منير
هافكر فى ربنا و قد إيه هو معايا و جنبى و رزقنى بحاجات حلوة كتير
هافكر فى كل الحاجات الحلوة دى و هاحل تاح السعادة
***
السؤال الأول: ماهى السعادة من وجهة نظرك؟
السعادة هي الرضا
هى إنى أحب كل الحاجات اللى ربنا خلقها حواليه و أحس قد إيه ربنا رحمن و رحيم بي
و قد إيه كل شئ فى الكون ممكن يرضينى لو أنا بس عرفت حكمة ربنا فى خلقه
السؤال الثانى: كيف تصل إلى السعادة؟
أنا ممكن أوصل للسعادة بالحب
أحب ربنا و أحب كل مخلوقاته
أرضى عن حكمة ربنا فى تصريف الأمور
ما أطلبش من كل مخلوق أكتر من اللى هو يقدر يكونه
السؤال الثالث: هل السعادة وهم أم أنها حلم صعب؟
السعادة مش وهم و كمان مش حلم صعب
السعادة حوالينا فى كل مكان بس إحنا اللى تايهين عنها بالبحث عن اللى مش ملكنا و عدم الرضا باللى بين أيدينا
السؤال الرابع : هل السعادة طريق للنجاح ؟وضح؟
أكيد
لو أنا راضية عن شغلى ( مثلا ) هاكون سعيدة بيه و هاديله كتير من طاقتى و مجهودى و هاخلص له و بالتالى هانجح فيه
و ده ممكن يكون الحال فى كل أمور حياتنا
السؤال الخامس: ماهى أكثر اللحظات التى شعرت فيها بالسعادة؟
من أكتر اللحظات اللى حسيت فيها بالسعادة فى حياتى لحظة توقيعى على عقد زواجى بإيهاب فى مشيخة الأزهر
كمان اللحظة اللى بصحى فيها من نومى و أتأمل ملامح إيهاب و أحمد ربنا إنه رزقنى بيه
السؤال السادس:هل ممكن أن تحقق كل شىء؟
مفيش إنسان ممكن يحقق كل شئ بيتمناه
لكن فى إنسان بيرضى بكل شئ متاح ليه و ده الأسعد من وجهة نظرى
السؤال السابع: السعادة تجعلك تقبل على الحياة أم لا؟
طبعا
مفيش إنسان تعيس و مش راضى عن حياته بيحب إنها تستمر
لسؤال الثامن: هل أحسست يوما انك وصلت لقمة السعادة؟
زمان كنت بتخيل إن قمة السعادة هى إنى أجرى و أتنطط فى الشارع و أرقص تحت المطر
دلوقتى قمة السعادة إنى أقعد بعد العشا جنب إيهاب أقرا و هو بيشتغل و بين لحظة و التانية أتأمله و أشوف ابتسامته
آه .. الحمد لله على قمة سعادتى
السؤال التاسع: لماذا تمر أوقات السعادة بسرعة؟
السعادة اللحظية اللى قايمة على متعة من المتع هى اللى بتمر بسرعة .. لكن سعادة الرضا دايمة على طول فى القلب المؤمن بربنا
السؤال العاشر: هل أنت متفاؤل وعندك أمل؟ وضح؟
آه .. متفائلة و بستمد الأمل من ثقتى التامة بوجود ربنا و بأنه مطلع على أحوالى و بأن إختيار ربنا دايما هو الأفضل بالنسبة لى فى كل الحالات
حتى لو فى أمر من الأمور أنا شايفاه مش كويس بالنسبة لى ببقى عارفة إنه مادام من عند الله فهو خير
السؤال الحادى عشر: إذا شعرت بالحزن ماذا تفعل؟
بدعى ربنا يفك كربى .. و ربنا دايما عند حسن ظن عبده به
السؤال الثانى عشر: هل يستمر معك الحزن فترة ام ينقضى فى الحال؟
كل شئ فى الدنيا ربنا خلقه و ليه ميعاد
الخزن ليه ميعاد و الفرح ليه ميعاد
و حتى لو انتهى فى الحال .. فهو ده ميعاده اللى ربنا كاتبه
***
كده أسئلة التاج خلصت .. و لأول مرة هامرره
حقيقى أحب أعرف إجابات صديقاتى على الأسئلة دى و بالذات
علياء بسيونى
جومانا حمدي
رزان محمود
أوفيليا
ملكة بدر
كاميليا حسين
ليساندرا
أم هاجر
و طبعا مستنية رد إيهاب

Wednesday, January 14, 2009

.............. تساؤل


لــــــــــيه لأ ؟

Tuesday, January 13, 2009

و ماذا بعد ؟


يملأ الطنين أذنى
أجرى .. فتخوض قدماى فى دماء و أتعثر فى أشلاء
أركض لأهرب .. فأضيع بي ممرات تتفرع من ممرات تتفرع من ممرات
أضل طريقى بين المرات و فجأة أتذكر أنى من قمت بتمزيق هذه الأشلاء و أنى من تسببت فى إراقة هذه الماء
أصرخ .. بنحبس صوتى فى حلقى و تمتلأ الممرات من حولى بالراكضين فى كل إتجاه
أحاول أن أركض فتزل قدمى و أهوى تحت أقدام الركضين الذين يطأون جسدى بلا رحمة
أستسلم للأقدام التى تطأنى و أعجز عن التنفس
***
أشعر باختناق رهيب أثناء نومى و أستيقظ مفزوعة خائفة
أقضى باقي يومي فى بكاء حار مرير
و أتسائل ماذا بعد
***
ماذا بعد ............ ؟
تعبت و تعب كل من حولى
ضجرت و شعروا هم أيضا بالضجر من حالتى
أتسائل لماذا ولا أجد جوابا
أقرر ألا أبكى و ألا أحكى .. و لكن إن استطعت أن أمنع البكاء و الحكى .. ترى أأستطيع أن أمنع الدموع ؟
أأستطيع أن أمنع الإكتئاب ؟
أأستطيع أن أمنع الكوابيس من أن تزورنى ليلا ؟
ماذا أستطيع أن أفعل ؟
يسيطر الصداع على رأسى ولا أستطيع قهره .. ينقبض قلبي و أشعر بثقل فى أطرافى ... و لكن ماذا أستطيع أن أفعل ؟
كيف أرد هذا البلاء ؟
أبتهل إلى الله فهو معينى
أصرخ يا رب
يا رب
يا رب
يا مغيث
اللهم أصلح لى أمرى كله ولا تكلنى إلى نفسى طرفة عين
اللهم إحمنى من نفسى و من شياطين الصحو و المنام
اللهم ارفع غضبك و مقتك عنى
اللهم أغثنى
يا غياث
يا مفرج كرب المكروبين و حامى المستضعفين .. فرج كربى و احمنى من ضعف نفسى
يا رب كن معى ولا تكن على
اللهم إنى سلمت إليك أمرى كله فتقبلنى و ارحمنى
اللهم رحمتك أرجو
اللهم عفوك أريد
اللهم إهد قلبى و امنحه سلاما و أمنا
اللهم إهد عقلى و انصره فى هذه المحنة
اللهم امنح روحى رضاك و الجنة
اللهم تقبلنى


Thursday, January 8, 2009

Freedom & Chocolate


امبارح كنت بتفرج على فيلم معرفش اسمه .. بس كانت فكرته مرعبة قوى بالنسبة لى على الأقل
إيه اللى ممكن يحصل لو تم منع أكل و بيع و تصنيع و تخزين و نقل الشيكولاتة ؟
مش عارفة ايه اللى ممكن يحصل للناس .. بس عارفة إن حياتى أكيد هاتتأثر بشكل كبير
الشيكولاتة ارتبطت فى حياتى بحاجات كتير قوى
أول ما بحس إنى محبطة و محتاجة دعم كبير فى حياتى أو محتاجة دفعة لقدام .. بتكون الدفعة دى عبارة عن بار جلاكسى كبير بالبندق
لما كنت بخرج وحدى كنت بشترى لى بار شيكولاتة كبير و امشى آكله فى الشارع فمش بحس وقتها إنى ماشية وحدى
لما بحب أحمس نفسى نفسى للمذاكرة أو للشغل كنت بوعدنى بأنى لو خلصت مذاكرتى أو شغلى بسرعة هاشترى لى شيكولاتة
طبعا غير جلسات السهر مع صوت الست أم كلثوم و بار الشيكولاتة فى إيدى
و طبعا إحتفال الكريسماس اللى لازم يكون بشكولاتة على شكل شجرة و بابا نويل
و فى البرد أحلى حاجة لما بخلص شغلى و كل إلتزامات البيت اللى ورايا و أسهر قدام الكومبيوتر و معايا مج شيكولاتة كبير باللبن
الشيكولاتة مهمة قوى فى حياتى
الشيكولاتة بتونسنى
الشيكولاتة بتقوينى
الشيكولاتة بترفع من روحى المعنوية
الشيكولاتة بتهدى أعصابى
الشيكولاتة بتدعمنى
الشيكولاتة بتدفينى
الشيكولاتة بتخلينى أبتسم إبتسامة كبيرة قوى
الشيكولاتة بتحسسنى إنى لسه صغيرة و ماكبرتش
الشيكولاتة بتحسسنى إنى طايرة
الشيكولاتة بتدينى حريتى