Thursday, January 8, 2009

Freedom & Chocolate


امبارح كنت بتفرج على فيلم معرفش اسمه .. بس كانت فكرته مرعبة قوى بالنسبة لى على الأقل
إيه اللى ممكن يحصل لو تم منع أكل و بيع و تصنيع و تخزين و نقل الشيكولاتة ؟
مش عارفة ايه اللى ممكن يحصل للناس .. بس عارفة إن حياتى أكيد هاتتأثر بشكل كبير
الشيكولاتة ارتبطت فى حياتى بحاجات كتير قوى
أول ما بحس إنى محبطة و محتاجة دعم كبير فى حياتى أو محتاجة دفعة لقدام .. بتكون الدفعة دى عبارة عن بار جلاكسى كبير بالبندق
لما كنت بخرج وحدى كنت بشترى لى بار شيكولاتة كبير و امشى آكله فى الشارع فمش بحس وقتها إنى ماشية وحدى
لما بحب أحمس نفسى نفسى للمذاكرة أو للشغل كنت بوعدنى بأنى لو خلصت مذاكرتى أو شغلى بسرعة هاشترى لى شيكولاتة
طبعا غير جلسات السهر مع صوت الست أم كلثوم و بار الشيكولاتة فى إيدى
و طبعا إحتفال الكريسماس اللى لازم يكون بشكولاتة على شكل شجرة و بابا نويل
و فى البرد أحلى حاجة لما بخلص شغلى و كل إلتزامات البيت اللى ورايا و أسهر قدام الكومبيوتر و معايا مج شيكولاتة كبير باللبن
الشيكولاتة مهمة قوى فى حياتى
الشيكولاتة بتونسنى
الشيكولاتة بتقوينى
الشيكولاتة بترفع من روحى المعنوية
الشيكولاتة بتهدى أعصابى
الشيكولاتة بتدعمنى
الشيكولاتة بتدفينى
الشيكولاتة بتخلينى أبتسم إبتسامة كبيرة قوى
الشيكولاتة بتحسسنى إنى لسه صغيرة و ماكبرتش
الشيكولاتة بتحسسنى إنى طايرة
الشيكولاتة بتدينى حريتى

7 comments:

bluestone said...

الفيلم اسمه شوكولا
وفعلا لو اتمنعت الشيكولاتة بالقانون
هنضم لصفوف المقاومة :)

Reem said...

متشكرة قوى على اسم الفيلم .. لأنى لما فتحت التليفزيون كانت التترات بتاعت الفيلم خلصت

بخصوص المقاومة طبعا عندك حق

Om HAGAR said...

فعلاً الفيلم تحفة و مبهر بكل أشكال و ألوان و أصناف الشيكولاتة اللي فيه.

تعرفي أنا كمان مقدرش أعيش من غير الشيكولاتة بس مش لدرحة اني أتظاهر علشانها متهيألي في حاجات كتييييييييييييييييير في حياتنا تستاهل مننا النوع دا من رد الفعل

و عموماً استمتعي بكل لحظة فيها شيكولاتة و ابقي ابعتي لي مج شيكولاتة باللبن من فضلك :)

مودتي

جيهان علي said...

السلام عليكم ورحمة الله

لم أشاهد الفيلم
لكن أوافقك تماما أن فكرة منع الشيكولاتة مرعبة إلى ما لا نهاية
الشيكولاتة نوع من أنواع الإدمان اللذيذ
ولها تأثير كبير جدًا على المعنويات وتغيير المزاج
أنا بقى بحب الشيكولاتة من غير أي مكسرات لا بندق ولا غيره بحبها كدة لوحدها
ولشيكولاتة الساخنة باللبن لها سحر تاني خصوصا في ليالي الشتاء
ويسلام بقى لو في مطر بيخبط على نوافذ الغرفة ومعاكِ رواية حلوة بتقريها

احم

معليش روحت بعيد مع الشيكولاتة لكن كلامك عنها خلاني افتح المجال للكلام

شكرًا لكِ

تحياتي

Reem said...

أم هاجر

الفيلم فعلا حلو قوى قوى

فكرة التظاهر مش كانت بس عشان الحرمان من الشيكولاتة إنما كانت عشان الحرمان من حق طبيعى للانسان

يعنى تظاهر عشان الحرية

على فكرة

مج الشيكولاتة جهزته ليكى 3 مرات و كل مرة مش بتبعتى حد ياخده

أعمل فيكى ايه بقى ؟

Reem said...

جيهان

احم .. و كمان معلش

يا بنتى ده الكلام عن الشيكولاتة احلى كلام

كفاية تأثيرها على المزاج و المعنويات

و بصراحة الجو اللى انتى وصفتيه بتاع البرد و المطر و رواية حلوة و شيكولاتة جو ساحر

المهم

استمتعى بكل الشيكولاتة السادة اللى فى الدنيا

و لك حبى

مياسي said...

نفس إحساسي بس تجاه الكيت كات
أكون ماشيه في الشارع متنكده مع صاحبتي

كت كات رايحه وكت كات جاي

شيكولاته من أروع الأفلام؛ بس الفكره أعمق من هيك؛ الفكره في المنع لمجرد المنع فقط:)