Thursday, January 15, 2009

تاج .. السعادة

هاملا الدنيا بلالين ملونة و أفكر فى حاجات حلوة و جميلة
هافكر فى كل الناس اللى حوالي و بيحبوني
هافكر فى شروق الشمس و فى العصافير الملونة و الشيكولاتة بالبندق
هافكر فى إيهاب و فى عيلتى و أصحابى
هافكر فى معرض الكتاب اللى جاى و كل ذكرياتى الحلوة فيه
هافكر فى والت ديزنى و أفلامه و الحكمة اللى ربنا خلقه عشانها
هافكر فى هانز كريستيان أندرسون و أميراته و فرسانهم و كل الجنيات الطيبين
هافكر فى صوت فيروز و على الحجار و محمد منير
هافكر فى ربنا و قد إيه هو معايا و جنبى و رزقنى بحاجات حلوة كتير
هافكر فى كل الحاجات الحلوة دى و هاحل تاح السعادة
***
السؤال الأول: ماهى السعادة من وجهة نظرك؟
السعادة هي الرضا
هى إنى أحب كل الحاجات اللى ربنا خلقها حواليه و أحس قد إيه ربنا رحمن و رحيم بي
و قد إيه كل شئ فى الكون ممكن يرضينى لو أنا بس عرفت حكمة ربنا فى خلقه
السؤال الثانى: كيف تصل إلى السعادة؟
أنا ممكن أوصل للسعادة بالحب
أحب ربنا و أحب كل مخلوقاته
أرضى عن حكمة ربنا فى تصريف الأمور
ما أطلبش من كل مخلوق أكتر من اللى هو يقدر يكونه
السؤال الثالث: هل السعادة وهم أم أنها حلم صعب؟
السعادة مش وهم و كمان مش حلم صعب
السعادة حوالينا فى كل مكان بس إحنا اللى تايهين عنها بالبحث عن اللى مش ملكنا و عدم الرضا باللى بين أيدينا
السؤال الرابع : هل السعادة طريق للنجاح ؟وضح؟
أكيد
لو أنا راضية عن شغلى ( مثلا ) هاكون سعيدة بيه و هاديله كتير من طاقتى و مجهودى و هاخلص له و بالتالى هانجح فيه
و ده ممكن يكون الحال فى كل أمور حياتنا
السؤال الخامس: ماهى أكثر اللحظات التى شعرت فيها بالسعادة؟
من أكتر اللحظات اللى حسيت فيها بالسعادة فى حياتى لحظة توقيعى على عقد زواجى بإيهاب فى مشيخة الأزهر
كمان اللحظة اللى بصحى فيها من نومى و أتأمل ملامح إيهاب و أحمد ربنا إنه رزقنى بيه
السؤال السادس:هل ممكن أن تحقق كل شىء؟
مفيش إنسان ممكن يحقق كل شئ بيتمناه
لكن فى إنسان بيرضى بكل شئ متاح ليه و ده الأسعد من وجهة نظرى
السؤال السابع: السعادة تجعلك تقبل على الحياة أم لا؟
طبعا
مفيش إنسان تعيس و مش راضى عن حياته بيحب إنها تستمر
لسؤال الثامن: هل أحسست يوما انك وصلت لقمة السعادة؟
زمان كنت بتخيل إن قمة السعادة هى إنى أجرى و أتنطط فى الشارع و أرقص تحت المطر
دلوقتى قمة السعادة إنى أقعد بعد العشا جنب إيهاب أقرا و هو بيشتغل و بين لحظة و التانية أتأمله و أشوف ابتسامته
آه .. الحمد لله على قمة سعادتى
السؤال التاسع: لماذا تمر أوقات السعادة بسرعة؟
السعادة اللحظية اللى قايمة على متعة من المتع هى اللى بتمر بسرعة .. لكن سعادة الرضا دايمة على طول فى القلب المؤمن بربنا
السؤال العاشر: هل أنت متفاؤل وعندك أمل؟ وضح؟
آه .. متفائلة و بستمد الأمل من ثقتى التامة بوجود ربنا و بأنه مطلع على أحوالى و بأن إختيار ربنا دايما هو الأفضل بالنسبة لى فى كل الحالات
حتى لو فى أمر من الأمور أنا شايفاه مش كويس بالنسبة لى ببقى عارفة إنه مادام من عند الله فهو خير
السؤال الحادى عشر: إذا شعرت بالحزن ماذا تفعل؟
بدعى ربنا يفك كربى .. و ربنا دايما عند حسن ظن عبده به
السؤال الثانى عشر: هل يستمر معك الحزن فترة ام ينقضى فى الحال؟
كل شئ فى الدنيا ربنا خلقه و ليه ميعاد
الخزن ليه ميعاد و الفرح ليه ميعاد
و حتى لو انتهى فى الحال .. فهو ده ميعاده اللى ربنا كاتبه
***
كده أسئلة التاج خلصت .. و لأول مرة هامرره
حقيقى أحب أعرف إجابات صديقاتى على الأسئلة دى و بالذات
علياء بسيونى
جومانا حمدي
رزان محمود
أوفيليا
ملكة بدر
كاميليا حسين
ليساندرا
أم هاجر
و طبعا مستنية رد إيهاب

8 comments:

lyssandra said...

ربنا يديم عليكي السعاده

ربنا يديم عليكي نعمة وجود إيهاب جنبك وحبه ليكي يارب

=============

سعيده أوي ان البوست ده ليه طعم الهدوء النفسي .. الراحه .. البهجة

===============

شكراً علي التاج يا ريم
سعيده إني كنت في بالك

بس أنا هاخده ومش هاجاوبه دلوقتي
مش ليا مزاج حالياً أتكلم عن سعاده مش شايفاها
أو علي الأقل سايباني لبعض الألم

هاجاوبه بس فس وقت تاني

ميرسي يا جميلة
===========


أمنيات طيبه ودعاء من أجلك

:)

Lyssandra

blue-wave said...

حلوة اوى اجاباتك
تحياتى

جيهان علي said...

السلام عليكم ورحمة الله

واحد من أفضل التاجات التي قرأتها على الإطلاق من حيث الإجابات

ربنا يرزقك الرضى والسعادة التامة


تحياتي

corbina said...

الله اكبر عليكم
ربنا يسعدكم يارب

بحس كتير اوى يا ريم انك بتتكلمى بلسانى
سبحان الله
بتقولى الكلام اللى انا مش عارفة اترجمه لكتابة


ربنا يسعدك و يكرمك و يخليلك ايهاب يارب

و يرزقكم الذرية الصالحة قادر يا كريم

بجد بجد بحبك اوى
و الله العظيم

و مش عارفة ليه
بس بحبك


يارب يارب يبعد عنكم كل شر ياااااااااااااااااااااااااارب

Reem said...

ليسى

ربنا يبارك لك و يسعدك

و منتظرة اجاباتك

***

دمت لى

Reem said...

بلو ويف

أشكرك

Reem said...

جيهان على

ربنا يبارك لك و بيارك فيكى يا جيهان

و متشكرة على رأيك

Reem said...

كوربى

أنا كمان بحبك قوى

و بتمنى ربنا يبارك لك و يسعدك فى حياتك كلها

و بيعد عنك و عن بيتك كل شر

خدى يالك على نفسك و على جنى و نفسى أشوفها بقى