Tuesday, May 13, 2008

حاجات بتسعدنى


لما بكون متضايقة بحب أفكر فى الحاجات اللى بتسعدنى
بحب أستحضرها فى خيالى و أضغط بيها على مسببات ألمى فيروح الألم و أحس بالدنيا رجعت تنور تانى
و ده جزء من الحاجات اللى بتسعدنى
ـ أنزل البحر
ـ أقرا فى مدونتى
ـ أشوف فيلم حلو فى السينما
ـ أقضى يوم كامل فى البيت وحدى
ـ أقرا فى جو هادى
ـ أسمع أغنية جديدة لمحمد منير
ـ أشترى بالونات و لعب
ـ أقشر مانجايه كبيرة و أقطعها صوابع و آكلها بالشوكة
ـ أشترى تورتاية كبيرة بالفواكه
ـ أنزل ألف على المحلات و أشترى حاجات للبيت من السوبر ماركت
ـ أسمع أغانى أطفال و أنا واقفة بشتغل فى المطبخ
ـ أتفرج على قيلم كارتون و بالذات لو لواحدة من أميرات ديزنى و يا سلام على السعادة بقى لو كان ده فيلم عروسة البحر
لما بعمل حاجة واحدة بس من الحاجات دى بحس إنى بطير من الفرحة و برجع تانى زى الأطفال الصغيرين لو عملت أكتر من حاجة منهم مع بعض

Monday, May 12, 2008

تقرير الأسبوع الأخير


سبت شغلى
نادانى مديرى ( السابق ) عشان يلومنى على غياب يوم
جهز نفسه لمناقشة طويلة عريضة و مجادلة و شد و جذب و إستعطاف ( من ناحيتى طبعا ) ، رحت مكتبه و قعدت بمنتهى الهدوء و أنا تقريبا عارفة موضوع المناقشة
:بدأ بالجملة الخالدة اللى شكلهم بيدوها فى كورس لكل اللى عايزين يبقوا مديرين ، قالى
ـ تفتكرى انتى بتشتغلى هنا فين ؟ دى مش طابونة عيش يا آنسة
(طب يا ريتها كانت طابونة )
رديت عليه و قلت له : خلاص هاعدى آخد أوراقى و أستلم ملف تعيينى من شئون العاملين ، بعد إذنك
سبته و وشه أحمر زى عرف الديك
صعب على ساعتها و أنا شايفة كل آماله فى تعنيفى بتنهار قدام عينيه
حسيت إنى أحبطته
حسيت إنى قاسية و شريرة قوى
***
أحب أطير فى البراح
حبيبتى هى الجناح
و هى ورد الندى
و هى شمس الصباح
من أغنية حرية
غناء على الحجار
***
تجربة جديدة بيمر بيها شعرى لأول مرة
بدلت زيت شعرى اللى مش بستعمل غيره من أكتر من 10 سنين بكريم شعر من نوع جديد
***
حريـــــــــــــــــــــــــة
***
منتجات لوكس الجديدة روعة
صابون بالبندق و صابون بالفراولة و كريم بالعسل و شاور جيل بالعنب
أجمل شئ فى الدنيا إن الواحد يحس إن فى ناس بتهتم بيه و تراعى ذوقه فى الأكل للدرجة دى
***
بعد خروجى من شئون العاملين بملف تعيينى مريت على مكتبى ( قصدى اللى كان مكتبى ) قلت أسلم على زمايلى و آخد أى حاجة شخصية تخصنى من هناك
لقيتنى مش قادرة أقول حاجة أكتر من سلام أنا ماشية
و الأهم إنى مالقيتش أى حاجة تخصنى فى المكان ده
إشتغلت فيه 6 شهور و حتى مش كان عندى درج مكتب أحط فيه حاجاتى
***
الحمد لله
***
............... حريـــــــــــــــــة
***
كل يوم خناقة فى الميكروباص و خناقة فى السوق
كل مكان بندفع فيه فلوس بقينا بنتخانق فيه
مفيش فلوس
مفيش غير رحمة ربنا
***
الفازة الكريستال اللى اشتريتها للبيت تحفة
و حتت الكريستال اللى هاحطها جوه الفازة الكريستال بتلمع بشكل تحفة
و الورد و الزهور و فروع الأعشاب البرية اللى اشتريتها عشان أحطها فوق حتت الكريستال اللى جوه الفازة تحفة
و الشمس اللى بتدخل من الشباك عشان تنور البيت و ترمى ضيها على الفازة و حتت الكريستال و الورد أكتر من تحفة
***
الحمد لله
***
و أنا خارجة من المكتب ندهت على واحدة من اللى كانوا زمايلى هناك
سألتنى : هبه إنتى زعلانة ؟
قلت لها : تؤ
لخصت علاقة 6 شهور بالشركة دى فى تؤ
***
رجعت أسمع كل الأغانى اللى كنت محرومة منها
رجعت أخرج بالنهار و أشوف الشمس
رجعت
رجعت لحياتى تانى
***
............... حريــــــــــة
***
تؤ
***
حتى ستيكر توم و جيرى اللى كان ملزوق على المكتب اللى كنت بشتغل عليه لزقه اللى كان بيشتغل عليه قبلى
***
تؤ
***
شكلى هابدأ أحب كريم الشعر الجديد
... و يمكن لأ
***
................................... حريـــــــــــــــــــــة
***
أسمى أنا مايهمش
أما اسمها حرية
حرية
حرية

Sunday, May 4, 2008

... ألبوم صورى


ده ألبوم الصور اللى قررت أستلفه من عليا
ببساطة دى صور حالتى المزاجية اليومين دول
***
الحالة الإجتماعية
عروسة و لسه بالطرحة كمان
بحب الدنيا و بحب حبيبى و هاخده و نهرب من الدنيا دى كلها لحضن بيتنا



الحالة المزاجية
متوهجة
شديدة الرقة و الأنوثة و متألقة بالحياة
الحمد لله و الفضل لحبيبى



المطربة المفضلة
الست فيروز
صوت قلبى



الفيلم المفضل
الباب المفتوح
الفيلم اللى شكل رؤيتى للحياة

حيوان بربيه
القطط
دى مش صورة قطتى
بس هى تشبه كوكو قطتى جدا و كمان كنت بدخلها جيبى بنفس الشكل




مكان الإقامة
حضن إيهاب
بيتى و وطنى و إنتمائى



مقر العمل
فى المطبخ .. فى البيت
بس عشان حبيبى يكون راضى و مستريح فى حياته






كيف أصف شكلى ؟
بنوتة صغيرة .. رقيقة .. طايرة من الفرح بكل يوم من أيام عمرها








عملت إيه امبارح ؟


حاولت أعمل حاجة تسعد إيهاب فى نفس الوقت اللى هو كان بيعمل حاجة يسعدنى بيها




هاعمل إيه النهاردة ؟
هالعب
هاغنى
هاطير











إسمى
هبــــــــــــه
و خلاص مش بقيت بستخبى ورا أقنعة أو أسماء مستعارة



الحلوى المفضلة ؟
الفراولة بالسكر و الكريمة






********************
و متشكرة قوى يا عليا على ألبوم الصور
ربنا يخلى حياتك كلها سكر