Wednesday, December 31, 2008

رسالة نهاية السنة

عزيزي سانتا
طبعا إنت عارفنى لأن دى مش أول مرة أكتب لك فيها .. بس أنا عارفة إنك أكيد مستغرب لأن دى أول مرة أكتب لك فيها هنا فى المدونة
دايما كانت رسالتى ليك سر بخبيه تحت مخدتى كل ليلة كريسماس .. بس السنة دى مش عارفة ليه كتبتها كده
بس إنت عارفنى كويس و عارف حالاتي المزاجية المتقلبة
سانتا
تعرف السنة دى حصلت حاجات حلوة كتير قوى فى حياتى .. أكيد إنت عارف إنى ارتبطت للأبد بالانسان اللى بحبه
كمان عملت البيت الأبيض زى جناح الحمامة اللى فرشه أخضر زى الزرع اللى كنت طول عمرى بحلم بيه
و كمان بقيت فرد فى عيله جديدة جميلة بحبها قوى و كل فرد فيها بيحبنى قوى
الحمد لله كل حاجة ماشية مظبوط قوى و أمورى كلها بخير
شايفاك مبتسم و مبسوط عشانى
بس أنا مش عارفة مالى
فى حاجة جوايا خايفة و مخنوقة و قلقانة
مش عارفة هى إيه و بتتعبنى قوى
حاجة غريبة بتخلينى أحلم بكوابيس و أكتئب و أبقى مش مبسوطة
حالة غريبة كده من الملل بتحكم كل تصرفاتى
حاسة بملل من كل حاجة
سانتا
مش تزعل عشانى
بس لو تقدر تقول لى أعمل إيه فى تقلباتى المزاجية .. يا ريت تقول لى
طبعا إنت مستغرب عشان أنا عمالة أرغى كل ده و لسه ما طلبتش منك هديتى زى كل سنة
فاكر زمان الرسالة كانت بتبقى قايمة طويلة من الأمنيات اللى نفسى تتحقق بس دلوقتى مش عندى حاجة بتمناها
فاكر أخر حاجة اتمنتها منك ؟
شايفاك بتضحك
فاكر لما قلت لك عايزة أتفرج على فيلم عروسة البحر الصغيرة .. دلوقتى بقى عندى الأجزاء التلاتة بس لسه ماتفرجتش على الجزء التالت
مش متحمسة يا سانتا
مش مش متحمسة .. بصراحة حاسة إن فى حاجة جوايا اتغيرت و مش عارفة تتفاعل مع الفيلم
مخنوقة يا سانتا قوى قوى
حاجات كتير قوى بتحصل و بتخنقنى
من يومين عيطت كتير قوى لما شفت قصف غزة فى التليفزيون
و كمان نزلت وسط البلد لقيتها مليانة مظاهرات
تعرف يا سانتا أنا خايفة من إيه ؟
خايفة أبقى وحدى تانى .. خايفة من الناس اللى حواليه .. خايفة من التليفزيون و من عيلتى .. خايفة من الناس
كمان بخاف من الصوت العالى و بخاف من صوت الونش اللى بيرفع معدات البنا فى العمارة اللى جنب بيتى
بحس كأنه صوت حيوان من حيوانات ما قبل التاريخ
بحس وقتها إنى خايفة خوف بدائى و غير مبرر
تعرف يا سانتا أول مرة أقول كده إنى بخاف
طول عمرى بقول إنى كبيرة و شجاعة و أعرف أصرف أمورى و مش محتاجة حد فى حياتى
تعرف يا سانتا إنى كنت بقول الكلام ده و بتظاهر بإنه حقيقى عشان محدش ياخد باله إنى ضعيفة قوى و هشة قوى فيأذينى
حاجات قليلة قوى اللى بتونسنى لما إيهاب بيبقى مش معايا أهمها طبعا صوت فيروز
عارف بحس إن صوتها جاى من المكان اللى إنت بتيجى منه
تعرف إنى عمرى ما سألتك إنت ساكن فين
بحس إنك ساكن فى السما
هو إنت صحيح ساكن فى السما ؟
عارف يا سانتا .. نفسى أرجع صغيرة تانى
صغيرة بضفاير
ممكن ماتضحكش و تقولى إنتى كنتى لسه بتعملى ضفاير لحد 3 سنين فاتوا
عايزة أرجع تانى عندى 20 سنة و أعمل شعرى ضفيرة و أخرج أمشى فى الشارع يوم الكريسماس
أروح سينما بالنهار و أتغدى بره و أروح الأوبرا و أدخل متحف الفن الحديث
و الدنيا تمطر
نفسى فى المطر يا سانتا
An Innocent Love
ده اسم الفيلم اللى اتفرجت عليه النهارده .. فيلم قديم من السبعينيات .. معرفش حتى مين اللى كان بيمثل فيه
بس الفيلم لمس حاجة جوايا
لمس حاجة من عمر العشرين اللى بحبه
قلت لك يا سانتا إن نفسى أرقص تحت المطر ؟
على كل حال إنت عارف الموضوع ده فمش محتاج أقوله تانى
حاسة إنى مخنوقة يا سانتا و مش عارفة أعمل إيه
حاسة إنى مابقيتش فراشة زى الأول و ده مضايقنى قوى قوى
حاسة إنى بتغير
أقولك يا سانتا ..حاسة إنى بتحول من فراشة لفرخة و ماتسألنيش إزاى ده بيتم و المشكلة يا سانتا إنى طول عمرى بكره الفراخ
سانتا إنت زهقت من كلامى ؟
أصلك بتوحشنى و مش بكلمك غير من السنة للسنة
طيب خلاص مش هاطول عليك عشان أنا عارفة إنك مشغول و بتلف الدنيا كلها النهاردة و هاطلب الحاجات اللى نفسى تتحقق فى السنة الجديدة
نفسى أحضن البحر
نفسى أحضر حفلة لعلى الحجار فى ساقية الصاوى
و كمان نفسى فى الأمنية الصغيرة اللى أنت عارف إنها هاتسعدنى قوى قوى
بس يا سانتا خلاص كده بقى
روح شوف شغلك
و خد بالك على نفسك
أشوفك بقى السنة الجاية
كل سنة و إنت طيب و بخير

14 comments:

Killua said...

ربنا يارب يسعدك دايما ياقمر و تنولي كل اللي بتتمنيه
كل سنة و انتي طيبة ياجميل
و ان شاء الله تكون سنة جديدة حلوة عليكي تحققي فيها كل اللي نفسك فيه:)

حنين said...

انا رحت حفلة لعلي في الساقية:)

هو جميل خالص والله .. ومبهج كمان
يارب تروحي له قريب:>

كل سنة وانتي طيبة وانتي انتي

Reem said...

ميجو

و انتى طيبة يا قمرتى يا حلوة

و ربنا يسعدك دايما يا حبيبتى

Reem said...

رزان

الاول و انتى طيبة و سعيدة

بالنسبة لعلى أنا عمرى ما حضرت له حفلة خالص و حقيقى نفسى أحضر حفلة ليه .. بس تعرفى .. أنا حضرت له حاجة أروع من الحفلة

كنت مرة فى المكتبة الموسيقية بدار الاوبرا و كان على بيعمل بروفة هناك مع الفرقة بتاعته

تخيلى الجو

المكتبة الموسيقية هادية جدا مفيهاش أى صوت جاى من برا و أنا وافقة مستخبية على بعد مترين من على اللى بيغنى مع الفرقة بدون أى أجهزة صوت خالص

كان بيغنى و بيعيد مقاطع معينة فى كل أغنية و ماكانش فى حد من برا الفرقة غيرى

كنت حاسة كأنه بيغنى لى وحدى

صوته كان نقى جدا و رائع زى أجراس الكريستال و الفضة .. كأنه جاى من السما

كنت حاسة بنشوة مبهرة مش قادرة أوصفها لحد النهاردة على الرغم من مرور أكتر من 4 سنين على الموقف ده بس حقيقى أنا بعتبره من أروع المواقف اللى مرت فى حياتى

فضلت واقفة لحد ما البروفة خلصت و بعدين خرجت متسللة من المكتبة الموسيقية و مشيت وراه لحد ما ركب عربيته

و بس

lyssandra said...

كل سنة وانتي طيبه يا ريم

بجد حسيت جو طفولي أوي في البوست ده

كمان حسيت أد إيه إنتي تعبانه ومتضايقه ومش عارفه ليه

أقولك وماتزعليش .. ضحكت لما قولتي بتحول من فراشه لفرخه

بس رجعت حسيت أد إيه ممكن يكون ده مؤلم لو الواحد يحس الاحساس ده

كلامك كله مشاعر هادية ولطيفة وفيها نبرة حزن نفسي بجد انها تبعد عنك أوي

ربنا يسعدك يا ريم
ويحقق كل أمنياتك
ويبعد عنك الملل والخوف وكل حاجه ممكن تؤرقك

كل الحب عزيزتي
وأمنيات كثيرة أوي علشانك
وأمنية صغننه يارب تكون نفس الأمنية الصغيرة اللي هاتسعدك كتير أوي

:)

كل سنة وانتي طيبة

Lyssandra

فـتـفـوتـة فتافيت said...

السلام عليكم ورحمة الله

بحس بكلامك برقة جميلة
رقة بقت نادرة إني أجدها في الواقع
بقراها فقط في روايات وقصص

رسالتك حسيت فيها بجو طفولي جميل جدًا بريء جدااااااااااااااااااا

وبعد كلامك الرقيق
كل اللى أقدر اعمله إني أدعي ربنا يحققلك كل ما تتمنيه
ربنا يسعدك ويفرح قلبك
ويرزقك الخير دايما

سلام

حنين said...

الله .. الله عليكي بجد.. وصفك روعة
فعلا أحيانا البروفة بتبقى أحلى من الحفلة نفسها، وخصوصا لما بيكون بيغني ليكي وحدك
الله بجد ..
..
نفسي جدا جدا إني اسمعه بيغني صوت بس، من غير آلات..
صوته ما تتخيليش باحس إنه بيدفيني أد ايه
*الحضن*
:):)
...
الله بجد..
وحلو كمان إن عندك الذكرى دي جواكي، لما بتفتكريها بتدفي أكتر
وأكيد بتبتسمي
:)
..
دمتِ سعيدة، يارب

Ophelia said...

تعرفى انك قلتى على كل الى جوايا بالضبط ...

فقدان الحماسة لكل شىء حتى الاشياء الى بحبها ..

حاسة إنى بتغير و التغيير ده مش عاجبنى .. خايفة أفقد حاجات جميلة جوايا و بحبها فى نفسي أوى ...

نفسي أرجع اوى لعمر العشرين .. لما كانت الروح لسة بريئة و متلوثتش بألام كتير أوى

لما كنت آخد شمسيتى و أمشي على البحر فى عز النوة و المطر

أنا كمان كنت بكتب بس مش لسانتا .. لكن لصديقى المراسل الطائر الى قليل أوى الى يعرفوه فى الدنيا دى .. و مرة من سنين وصلنى منه جواب !

عايزة أقول حاجات كتير بس حتى صوابعى مش مطاوعانى عشان تكتب ...

شكرا ... :)

Reem said...

ليسى

و انتى طيبة يا ليسى

متشكرة قوى على رأيك فى البوست و على أمنياتك و دعواتك

مازعلتش عشان ضحكتى خالص .. التشبيه فى حد ذاته و التفكير فى التضاد اللى بين الفراشة و الفرخة فعلا يضحك .. بس المشكلة إنه بيكون مؤلم قوى لو كنتى حساه بجد

على كل حال أنا الحمد لله دلوقتى أحسن و ربنا يحقق لك فى السنة الجديدة اللى السعادة و الحب

Reem said...

فتفوتة

متشكرة قوى على دعواتك .. فعلا بتسعدنى و يا رب يسعدك و يحقق لك كل دعواتك و أمنياتك

Reem said...

زران

عندك حق

صوت على بالذات على الطبيعة و من غير موسيقى رائع


و طبعا اليوم ده دلوقتى من الذكريات اللى بحبها فى حياتى قوى اللى بتخلينى فعلا ابتسم

ربنا يسعدك انتى كمان

Reem said...

مروة

كلامك تعبنى قوى .. وجعنى

أنا كنت بكتب كل ده و بوهم نفسى إنه مش حقيقى .. مجرد انفعال لحظى .. بس كلامك حسسنى إنى بجد كتبت الحقيقة يمكن لأنك أكدتى لى إن مشاعرى حقيقة واقعة

مش عارفة أقولك ايه .. بس البوست ده مع كلامك بيحسسنى بمرار مالوش حدود

حاسة انى كبرت قوى و مخنوقة بكبر سنى ده قوى

Ophelia said...

هبة أنا آسفة أوى أوى
بجد مقصدتش أبدا أنى أضايقك
أنا كتبت الى انا حسيت بيه ساعتها من غير ما أفكر
مش عارفة أقول أيه بس و أعتذر إزاى
ربنا يخفف عنك و يفرح قلبك و يبعد عنك كل حزن او خوف
أنا آسفة أوى
أتمنى تقبلى إعتذارى

Reem said...

مروة

بتعتذرة عن ايه ؟

انتى اديتينى احساس بالمشاركة و بإنى مش وحدى و بإن الإحساس اللى انا حساه مش وهم

يا بنتى انا بسبب ردك ده نفسى اعرفك أكتر و نبقى أصحاب أكتر و نقرب لبعض أكتر و تأكدى إن ده هايسعدنى جدا جدا

خدى بالك على نفسك يا أرق مخلوقات ربنا