Thursday, December 18, 2008

... إصفرار


بقالى كتير عايزة أكتب و مش عارفة أكتب إيه
أكتب عن نفسى ؟
مش لاقيه حاجة أقولها
كل حاجة ماشية زى ما المفروض تمشى بالظبط
أكتب عن أغنية بحبها ؟
حتى الأغانى اللى بحبها مابقيتش بتعبر عنى
أكتب عن قصيدة عجبتنى أو مقطع حلو من كتاب فى إيدى ؟
بقالى فترة طويلة مش بقرا
أكتب عن المنتديات اللى بشارك فيها أو المواقع اللى بتعجبنى ؟
حاسة إن كل حاجة لونها أصفر
حاسة إن كل حاجة حواليه مش مظبوطة
و أنا مش بفكر .. مش بفكر خالص
مش بتكلم و مش عارفة أتكلم و مش عايزة أتكلم
بنام نوم كتير قوى و متواصل بعد أيام ماكنتش بنام فيها غير ساعة فى اليوم .. و بين النوم و الصحيان بدور على نفسى
مابقيتش أحلم ولا حتى بقت تجي لى كوابيس
آه .. بفكر بس و أنا نايمة
بشوف ناس و بدخل فى حوارات و مناقشات و باخد مواقف بس ببقى عارفة إنى نايمة و إن كل ده بيحصل جوه راسى بس
بصحى من النوم و الصداع محتل راسى و رافض يسيبها
عندى صداع لونه أصفر
عايزة أخرج
عايزة أروح إسكندرية و أشوف البحر
عايزة أنام فى البحر
عايزة أتعلق فى السما مع النجوم
عايزة أشوف أزرق مش أصفر
عايزة أنام من غير ما أصحى عندى صداع
عايزة أنام .. و بس

6 comments:

Om HAGAR said...

أنا عارفة الحالة دي كويس قوي و حاسة بيكي جداً و مش عارفة أقول لك و لا عارفة أنصحك لاني كمان بمر بنفس الحالة و مش عارفة أعمل ايه

بس بجد قد كدا كلماتك وصفت اللي جوايا تسلم ايدك

Reem said...

عزيزتى أم هاجر

الله يسلم عمرك و يسلمك من الحالة دى

أنا كمان مش عارفة أقولك تعملى إيه .. لأنى مش عارفة أتجاوز الحالة دى

بس اللى أقدر أقوله إنها حالة و بتمر .. ربنا يعديها بسرعة و على خير

فـتـفـوتـة فتافيت said...

السلام عليكم ورحمة الله

يبدو أنها حالة من الأصفرار العام
تجتاح مشاعر الكثيرن مننا وممن يحيطون بنا
ولا يبقى أمامنا إلا التمسك بالأمل كقشة أخيرة لنا

"عايزة أخرج
عايزة أروح إسكندرية و أشوف البحر
عايزة أنام فى البحر
عايزة أتعلق فى السما مع النجوم
عايزة أشوف أزرق مش أصفر
عايزة أنام من غير ما أصحى عندى صداع
عايزة أنام .. و بس "

تأثرت كثيرًا بهذا المقطع

تحياتي

lyssandra said...

حبيبتي سلامتك من الجو الأصفر ده والصداع

يمكن فترة خمول وان شاء الله هاتبقي كويسه جدا

كل سنة وانتي طيبة
وسنه سعيده عليكي
(هجري وميلادي (


ابقي طمنيني عليكي

Lyssandra

Reem said...

فتفوتة

هى فعلا حالة إصفرار و اكتئاب غريبة بتحاوطنا كلنا و زى ما انتى قلتى .. مفيش غير الامل اللى هايخرجنا من الحالة دى

متشكرة قوى على رأيك و على تأثرك

و ارجوكى .. داومى المرور

Reem said...

ليسى

الله يسلمك

أنا الحمد لله دلوقتى بقيت كويسة و أحسن كتير

و طبعا كل سنة و انتى طيبة انتى كمان

هجرى و ميلادى