Thursday, November 27, 2008

Merci.. Anne Jullie

لفترة طويلة جدا من حياتى ماكنتش أعرف أنا شكلى إيه
آه كنت ساعات ببص فى المراية لما كنت بسرح شعرى .. لكن غير كده لأ
فعلا ماكنتش أعرف شكلى
الموضوع ده استمر لفترة طويلة جدا من حياتى .. يمكن لحد ما عديت العشرين
طول الفترة دى و أنا شايفة نفسى بصورة معينة و ماهتمتش بإنى أعرف الصورة دى حقيقية ولا لأ
و فى مرة كنت أنا و واحدة صحبتى فى نادى التجديف و لما جينا نروح دخلنا التواليت على سبيل ظبط الشكل و الملابس
و فى حمام نادى التجديف اللى على الكورنيش وقفت قدام المراية و لأول مرة فى حياتى أتأمل ملامحى و أحاول فعلا أعرف أنا شكلى إيه
مش عارفة إيه الدافع للى حصل ده .. بس لقيته بيحصل
و ساعتها بصيت لملامحى اللى مصاحبانى فوق العشرين سنة باستغراب و لقيتنى بسأل نفسى : هى دى أنا ؟
الأمر إنى حسيت إنى بشوف نفسى لأول مرة ..فاستغربت
***
من يومين لما دخلت على موقع الرسامة الفرنسية آن جولى صدمت
صدمت لأنى ببساطة لقيت إن رسومات آن جولى هى بالظبط نفس الصورة اللى أنا كنت عارفاها عن نفسى فى العشرين سنة الأولانيين من عمرى
بالظبط كنت بشوف ملامحى كده مرسومة
بالظبط كنت بشوف شعرى كده طويل
بالظبط كنت بشوفنى بمشى كده فى الطريق

بالظبط كنت بشوفنى نايمة كده

بالظبط كنت بشوف ده فى أحلامى

أنا مش عارفة ده حصل إزاى بس عارفة إنى لو شفت آن جولى هاقولها متشكرة إنك رديتينى لنفسى

8 comments:

جومانا حمدي said...

الله يا ريم

بجد تحفة

يسلم ذوقكك

Reem said...

جومانه

تسلمى من كل سوء

و تسلمى لى

أحمد جمال said...

أنا مش عارف أرد والله .. :)

جميل اوي يا ريم

Reem said...

متشكرة قوى يا أحمد

عاشقة القاهرة said...

حلوة قوى بس متهيألى انا اللى كنت معاكى
عامة كويس أنك عرفتى صورتك أنا بقى لسة بدور على صورتى فى المرايا ومش بشوفها

Reem said...

مروة

آه طبعا .. إنتى اللى كنتى معايا

هو أنا كنت بروح حته من غيرك

***
قريب إن شاء الله هاتتحل كل مواضيع الصور و المرايات و الحاجات دى

صدقينى

قلبى بيقولى كده

و دى طبعا مش شعارات

Om HAGAR said...

قد ايه رسوماتها رقيقة و قد ايه انتي كمان رقيقة

Reem said...

أم هاجر

رسومات آن جولى بالفعل أرق رسومات شفتها فى حياتى .. أما بقى عن رقتى أنا .. فأنتى فعلا كسفتينى

متشكرة قوى قوى على رأيك