Friday, July 11, 2008

لسه 90 ساعة


باقى من الزمن بس 90 ساعة
آه و الله 90 ساعة بس و اتنقل لبيتى الجديد و أقضى باقى عمرى مع إيهاب إن شاء الله
مجرد 90 ساعة بس المفروض أكمل فيهم فرش الشقة و و تجهيز متطلبات للبيت و شرا سجادة لأوضة المكتب و نزلتين للسوق و السوبر ماركت عشان أشترى حاجات للمطبخ و التلاجة
آه و كمان عايزة أعلق ستارة البكونة بعد ما آلاقى حد يركب لها الماسورة بتاعتها
و كمان نسيت تركيب عتبة للحمام و الأوض
كمان بفكر فى تركيب سلك لشباك المطبخ
و كمان نسيت إنى المفروض أكوى الستاير فبل ما تتعلق و أكوى هدومى قبل ما أرصها فى الدولاب
بس مش مشكلة لسه عندى وقت أصل فاضل بس 90 ساعة
طبعا خلال الـ 90 ساعة دول المفروض إنى أجهز نفسى عشان يبقى شكلى عروسة مش مجرد أم عبده الشغالة اللى بقيت شبهها خالص
بس مش أزمة أصل لسه باقى 90 ساعة و الستاير و سجادة أوضة المكتب و مكوة الهدوم و مسح الشقة و فرشها و تعليق المطبخ و المطبقية و التابلوهات و مشتريات التلاجة و توصيل الغسالة بوصلات صرف الميه و عميلة تحويلى من أم سيد الشغالة لعروسة
و قادر يا كريم
يا رب
بارك فى الـ 90 ساعة و قوينى


14 comments:

مريم يحيى said...

هبه
انتي عارفة انا مبسوطة اد ايه
كل كلمة بتقوليها بتأثر فيا اوي وبفرح اكتر واكتر
يا ريتني كنت في القاهرة عشان اشوفك وانتي عروسة
خالص تهانئي لكِ
و أتمنى من الله أن يجعل أيامك كلها سعادة

حشوفك يوميًا إن شاء الله على المسنجر :)

أحمد جمال said...

جميل اوي ..

الف الف الف مبروك ليكي يا هبة ولإيهاب ..

ربنا يبارك لكم يا رب

Ahmed Al-Sabbagh said...

الف الف مبروك يا هبة

هى جت متأخرة شوية

بس بجد فرحان بيكم اوىىىىىىىىىىى

ربنا يسعدكم يااااارب


احمد

عمرو عز الدين said...

إن شاء الله ربنا يبارك في التسعين ساعة و يبقوا تسعين سنة

ثواني أهش النملة اللي ماشية فوق زرار الإنتر

خلاص

بأقول كمان مبروك ليكي و لأخويا إيهاب، و إن شاء الله تقضوا مع بعض أسعد حياة


خالص تهانئي و تحياتي

عمرو

Anonymous said...

عارفة ياريمى
كان نفسى اكون موجودة والله ...واشوفك بالفستان الابض بس حصل ظروف ومش هاقدر اجى

بس بتمنالك من قلبى انك تبقى اسعد عروسة فى الدنيا ويارب يوفقك فى حياتك الجاية ياااااااااااااااارب

..كنت بسمع اغنية ..ماتحسبوش يابنات ان الجواز راحة..بتاعت فرقة المصريين
عاوزة اهديلك منه كوبليه واحد

" مهما نتعب نقول تعب الحبيب راحة "ا

ربنا يقويكى ويسعد بحايتك الجديدة

والف مبرووووك


هدير..دادوش

Anonymous said...

و أنا ضيعت لك 5 دقايق من ال 90 ساعة :(


مـــبـــروكـ


ندى

Reem said...

مريم يحيى

عارفة يا مريم إنك مبسوطة
و عارفة إنك إنتى و فيكى إخواتى

إن شاء الله آجى اسكندرية قريب و أفرجكم على صور الفرح و كأنكم كنتم معايا بالظبط

ربنا يسعدك يا مريم و يبارك لك فى كل خطوات حياتك

Reem said...

أحمد

ربنا يبارك فيك

و متشكرة على أمنياتك الطيبة

Reem said...

أحمد الصباغ

متشكرة قوى يا أحمد و يا رب نبارك لك فى فرحك قريب إن شاء الله

Reem said...

عمرو

الحمد لله ربنا بارك فى الـ 90 ساعة و اللى قدرت أعماه عملته

النملة اتهشت ؟؟؟

كويس

الله يبارك فيك و نبارك لك فى فرحك إن شاء الله

Reem said...

دادوووش

سبحان الله أمال مين اللى كان فى الفرح بالطشت الأحمر فى ودانه ؟

يمكن كنت بخرف و أنا بفستانى الأبيض

على كل حال يا دادووش أنا فرحانة و الله إنك قدرتى تييجى و عقبال ما أحضر فرحك بعد تخرجك إن شاء الله

و ساعتها هاسمع لك أغنية هاتجوز بتاعت أمينة

مطربة الحنطور

طبعا عارفاها

ربنا يوفقك يا حبيبتى

Reem said...

ندى

الله يبارك لك و يبارك فيكى

***

و الأصحاب عمرهم ما يضيعوا وقت بعض أبدا

طبعا مش محتاجانى أقولك إن ردك أسعدنى جدا و بالذات لأنى ماكنتش أعرف إنك بتمرى على مدونتى

بجد متشكرة يا ندى على طلتك الحلوة دى

Om HAGAR said...

أنا أول مرة أزور مدونتك الجميلة دي و ألاقي الخبر الحلو دا؟

ألف ألف مبروك يا عروسة لولولولولوييييي (دي زغرودة)

ربنا يبارك لكم يا رب و يجمع بينكم في خير و يبعد عنكم ولاد الحرام و يجعله الزوج الصالح ليكي و يجعلك الزوجة الصالحة ليه و يرزقكم الذرية الصالحة اللهم آمين.

قولي آمين

Reem said...

أم هاجر

أولا أنا فعلا اتشرفت بزيارتك للمدونة

و يا رب تكون إقامة دايمة مش مجرد زيارة عابرة

ثانيا متشكرة قوى على الزغرودة

ثالثا أنا سعيدة جدا بدعائك و بدعيه كل يوم و إنتى كمان ادعى لى على طول و عقبال هاجر نشوفها عروسة و ربنا يبارك لك فيها و يسعدك بيها العمر كله إن شاء الله

قولى آمين يا رب العالمين