Monday, May 12, 2008

تقرير الأسبوع الأخير


سبت شغلى
نادانى مديرى ( السابق ) عشان يلومنى على غياب يوم
جهز نفسه لمناقشة طويلة عريضة و مجادلة و شد و جذب و إستعطاف ( من ناحيتى طبعا ) ، رحت مكتبه و قعدت بمنتهى الهدوء و أنا تقريبا عارفة موضوع المناقشة
:بدأ بالجملة الخالدة اللى شكلهم بيدوها فى كورس لكل اللى عايزين يبقوا مديرين ، قالى
ـ تفتكرى انتى بتشتغلى هنا فين ؟ دى مش طابونة عيش يا آنسة
(طب يا ريتها كانت طابونة )
رديت عليه و قلت له : خلاص هاعدى آخد أوراقى و أستلم ملف تعيينى من شئون العاملين ، بعد إذنك
سبته و وشه أحمر زى عرف الديك
صعب على ساعتها و أنا شايفة كل آماله فى تعنيفى بتنهار قدام عينيه
حسيت إنى أحبطته
حسيت إنى قاسية و شريرة قوى
***
أحب أطير فى البراح
حبيبتى هى الجناح
و هى ورد الندى
و هى شمس الصباح
من أغنية حرية
غناء على الحجار
***
تجربة جديدة بيمر بيها شعرى لأول مرة
بدلت زيت شعرى اللى مش بستعمل غيره من أكتر من 10 سنين بكريم شعر من نوع جديد
***
حريـــــــــــــــــــــــــة
***
منتجات لوكس الجديدة روعة
صابون بالبندق و صابون بالفراولة و كريم بالعسل و شاور جيل بالعنب
أجمل شئ فى الدنيا إن الواحد يحس إن فى ناس بتهتم بيه و تراعى ذوقه فى الأكل للدرجة دى
***
بعد خروجى من شئون العاملين بملف تعيينى مريت على مكتبى ( قصدى اللى كان مكتبى ) قلت أسلم على زمايلى و آخد أى حاجة شخصية تخصنى من هناك
لقيتنى مش قادرة أقول حاجة أكتر من سلام أنا ماشية
و الأهم إنى مالقيتش أى حاجة تخصنى فى المكان ده
إشتغلت فيه 6 شهور و حتى مش كان عندى درج مكتب أحط فيه حاجاتى
***
الحمد لله
***
............... حريـــــــــــــــــة
***
كل يوم خناقة فى الميكروباص و خناقة فى السوق
كل مكان بندفع فيه فلوس بقينا بنتخانق فيه
مفيش فلوس
مفيش غير رحمة ربنا
***
الفازة الكريستال اللى اشتريتها للبيت تحفة
و حتت الكريستال اللى هاحطها جوه الفازة الكريستال بتلمع بشكل تحفة
و الورد و الزهور و فروع الأعشاب البرية اللى اشتريتها عشان أحطها فوق حتت الكريستال اللى جوه الفازة تحفة
و الشمس اللى بتدخل من الشباك عشان تنور البيت و ترمى ضيها على الفازة و حتت الكريستال و الورد أكتر من تحفة
***
الحمد لله
***
و أنا خارجة من المكتب ندهت على واحدة من اللى كانوا زمايلى هناك
سألتنى : هبه إنتى زعلانة ؟
قلت لها : تؤ
لخصت علاقة 6 شهور بالشركة دى فى تؤ
***
رجعت أسمع كل الأغانى اللى كنت محرومة منها
رجعت أخرج بالنهار و أشوف الشمس
رجعت
رجعت لحياتى تانى
***
............... حريــــــــــة
***
تؤ
***
حتى ستيكر توم و جيرى اللى كان ملزوق على المكتب اللى كنت بشتغل عليه لزقه اللى كان بيشتغل عليه قبلى
***
تؤ
***
شكلى هابدأ أحب كريم الشعر الجديد
... و يمكن لأ
***
................................... حريـــــــــــــــــــــة
***
أسمى أنا مايهمش
أما اسمها حرية
حرية
حرية

6 comments:

Ihab the 2nd said...

بعشق غنا روحك بالحرية
بيبو

Reem said...

ربنا يبارك لى فى روحك اللى خلت روحى تغنى بكل لغات العالم

Miss. Sosa said...

اسلوبك في التدوين رائع عامل زي عصفورة بتنط علي الارض مبتستقرش في اي حتة وبتنقر بمناقرها الدقيق الارض بخفة وترجع تطير لأنها اتخلقت حرة وبتستمتع بحريتها

ست المرتفعات said...

بطل تبقى حلوة كدا

Mohamed Gameel said...

احسدك على شجاعتك
ساعات مش بيكون بإيد الواحد غير انه يكمل بردو :)
بس الحرية حلوة
ويمكن اكتر اللي خايف عليه في حياتي حريتي
اصل هيا الحاجة الوحيدة اللي املكها تقريبًا
يا رب نلاقي في يوم شغل نحس فيه اننا احرار

Reem said...

سوسا

مش عارفة ارد اقولك ايه ؟

بس و الله كلامك اسعدنى جدا

كسفنى جدا

خلانى مش عارفة اقل حاجة

بس متشكرة جدا على رأيك فى كتاباتى

***

لولا

لمل أنا حلوة انتى تبقى إيه ؟

ردى بقى

***

أهلا يا ريس


الأمر مش محتاج حسد

هما كانوا شايفين إنى موظفة غير آهلة لتحمل المسئوليةو أنا كنت شايفة إنها شركة لا تطاق

المهم

تمسك بحريتك و خد قرارات و نفذها و بلاس تسيب الأمور معلقة بالشكل اللى بيضايقك

بس