Thursday, March 13, 2008

يا ترى الربع جنيه بيجيب ايه ؟

كل يوم و أنا رايحة شغلى بعد ما بنزل من الباص بيكون قدامى مسافة حوالى محطة و نص أمشيهم لحد ما أوصل مكتبى
المسافة دى لو أخدتها مشى .. هامشيها فى حوالى 7 دقايق بس
بس أنا أحيانا بركبها يعنى حسب الوقت و المزاج و إن كنت مرهقة ولا لأ
و فى الغالب لما بركبها بدفع للميكروباص 25 قرش يعنى ربع جنيه
من يومين ركبت زى كل يوم و طلعت الـ 25 قرش اللى هى يعنى الربع جنيه من شنطتى و إديته للسواق
بص له بقرف .. بص لى بقرف
و قالى : إيه ده ؟
قلت له: ده 25 قرش يعنى ربع جنيه ، أنا بدفعه كل يوم
قالى : لأ يا ماما ده كان زمان
ملحوظة على جنب : السواق اللى أكبر من أبويا كان بيقولى يا ماما كأنى جاية من أيام السحتوت ، المهم
قلت له : يعنى إيه ؟ أنا لسه دافعاه امبارح
قالى لى : ده النهارده مايجيبش حاجة
قلت له : خلاص إركن على جنب و نزلنى أنا مش هادفع أكتر منه
ركن و نزلنى و زعق فى و قالى : هو إنتى فكرك إن الربع جنيه بتاعك ده بيجيب حاجة ، ده كان زمان يا ماما ، كان زمان
صرخت فيه و قلت له : لأ لسه بيجيب
عارف بيجيب إيه ؟
الربع جنيه دلوقتى بيجيب طولة اللسان و قلة الأدب من واحد زيك
بيجيب حرقة الدم لواحدة زيى
و بيجيب رغيف عيش واحد مايشبعش طفل صغير
***
ياترى
الربع جنيه ممكن يجيب ـ تانى ـ إيه ؟

10 comments:

حمامة said...

والله عندك حق
مبقاش الا سواقين الميكروباصات كمان
ماهى بقت هيصه
حسبى الله

إبـراهيم ... معـايــا said...

ياااه يا ريم، الربع جنيه ده بِطِل من زماااااااان، ده حتى البسكوت بقى أوله نص جنيه !!!، وأنا حاسس إنه هيتلغي قريب أصلاً
*************
أنا كنت قلت لك إن اسم ريم البراري المستحيلة ده حلو ، وإن صاحبتها ليها رواية جمييييلة اسمها الخباء ؟

Ihab the 2nd said...

في كل زمن بتبقي فيه علمة بتنتدثر
اين المليم الان ؟
اين الخمسة قروش
اين العشرة قروش و العشرون قرش
لما الدولار بيساوي خمسة جنيه و نص دا يبقي صعب قوي ن الربع جنيه يساوي حاجة في السوق المحلية
انتي محاسبة شاهرة و فاهمة المهرجان اللي انا بتكلم عنه
و مع ذلك انا ساعات بركب من كوبري الخشب لغاية المرور بربع جنيه
يعني لسا بيجيب اهو
و ربنا يسهل

qwert anime said...

فى ناس كتير الربع جنية بنسبلها حاجة كبيرة زى شيخ جامع فى منطقة دار السلام بيدعى فى صلاة الجمعة للرئيس جمال عبد الناصر و ان جيشنا يخرج اعدائنا من سينا انا مش بهزر انا بالصدفة اضطريت اصلى هناك و حصل اللى حصل بس الناس كانت بتقول امين

جيهان علي said...

السلام عليكم ورحمة الله وبركاته

فعلا الربع جنية عملة في طريقها للإندثار .. وإذا كان الجنية مش بيجيب حاجة الربع جنيه هايجيب ؟!!
وإذا كان على سواق الميكروباص هو بشكل أو بأخر معزور - مش في قلة ذوقه في التعامل معاكِ طبعًا - لكن في أن الربع جنية مش بيجيب حاجة .

Amr Ezeldeen said...

فعلا الربع جنيه مبقاش بيجيب حاجة

و رغم أنى مش كبير فى السن للدرجة - 27 سنة إلا كام شهر - إلا أنى فاكر أيام ما كنت بآخد الربع جنيه و أجيب بيه حاجات كتير و آخد فى الآخر باقى خمسة صاغ من كانتين المدرسة

و لو حوشت يومين ممكن أجيب حاجة ساقعة و باتيه و لبان كمان و أحيانا عسلية

و واحدة واحدة الربع جنيه مبقاش بيجيب غير باكو بسكوت بيمبو

و واحدة واحدة.. و النهاردة الصبح بالذات لقيت البيمبو بقى بنص جنيه

يبقى الربع جنيه

هيجيب إيه ؟

أما سواق الميكروباص - المشروع عندنا فى إسكندرية ههههههه - فلازم يتعامل بالطريقة دى.. لأنه لو يعرف أنك زيك زيه و فى نفس الغم و الهم اللى عايشيين فيه ليل نهار كان زمانه اتكلم أحسن من كده و عرف أنك مالكيش ذنب زى ما هو مالوش ذنب

بس تعملى إيه بقى.. مبقاش فى حد طايق نفسه و لا عارف يفكر

تخاريف بنت عادية said...

لأ الربع جنيه ممكن يجيب
ممكن يجيب فرحة طفل صغير نفسه في شيكولاتاية ولا بسكوت

ممكن يجيب سعادة راجل زي اللي بشوفه كل يوم نايم جنب السور متدثر ببطنية مهترئة صيف او شتا ليل او نهار

الربع جنيه ممكن يجيب حاجة للناس البسيطة و ولا حاجة للناس الطماعة والجشعة

الربع جنيه ده لو صبرنا عليه شوية ممكن نحط جنبه كذا ربع جنيه ويجيب كتير

fatma said...

وحششششششششششششتييييني أووووي

عارفة الربع جنيه لسه بيجيب 5 لبانات تشيكلس
وباكو بسكون من انواع غير معروفه او مرئية اعلاميا او صحيا لكن لأ ده لسه الباستو بربع جنيه قبل ما يكبروه زي اخينا بتاع بيمبو واخينا نواعم ويخلوه ب50قرش ويقللوا منه بسكوتين
اصل انا من مدمنين نواعم وباكله وانا باعده دلوقتي

ما تظلموش الدنيا
الشلن بيتحط على ال60قرش عشان يبقوا65 قرش يودوا من جامعة القاهرة للمترو وما تقوليش ايه الحكمة من ال65قرش ويلاحقوا عليهاشلنات منين الشلن والبرزة والربع جنيه وال50قرش والجنيه بقوا حاجة سياسية لزوم زيادة الاسعار
يعني كيلوا الطماطم زاد2جنية وزجاجة الزيت زادت7 جنيه وميكروباص التحرير زاد بريزة
وميكروباص كوبري الخشب بكرة يبقي بنص جنيه لكن يا ايهاب باشا انت مش هاتبطل تروح للحته بتاعتك عشان ربع جنيه زيادة وعلى رأي البيه السواق (هو الربع جنيه يجيب ايه انهاردة )

Ihab the 2nd said...

من يومين و احنا مع بعض الربع جنيه ركبنا مواصلات من شبرا المظلات الي شبرا الخيمة
مش معني كدا انا بعارض كلامك .. بس مجرد ملاحظة

mero said...

الحمد لله .. توصلنا لفائدة للربع جنيه
:P