Monday, March 3, 2008

ما أرخص فى الدنيا الإنسان

دايما كل ما أنزل السوق ماعرش أشترى كل اللى أنا عايزاه بالفلوس اللى معايا
و أفكر
و أوسطن الأمور
و أقول بدل كيلو طماطم خليه كيلو إلا ربع
و أفكر هى شوربة الخضار ممكن تكون كويسة من غير الفاصوليا ؟
أصل كيلو الفاصوليا بـ 7 جنيه
آه
و الله العظيم كيلو الفاصوليا بـ 7 جنيه النهارده
و كيلو الزيت من النوع الردئ بـ 8 جنيه
و البسلة بـ 3.5 جنيه
و أنا واقفة وسط السوق و مش عارفة أتصرف
قلت خليها مسقعة و من غير لحمة مفرومة لقيت كيلو البتنجان الإسود بـ 3 جنيه
و أنا حاسة إنى تايهة
فكرت فى الجنة اللى مش فيها طوابير عيش ولا فيها لحمة بـ 45 جنيه الكيلو ولا فيها بت واقفة فى السوق بسألها بكام القرنبيطة الصغيرة تصرخ فيها و تقولى بـ 2.5 جنيه
فكرت فى الجنة بس المشكلة إنى لازم أشترى الخضار و أروح البيت دلوقتى
ما هو مش معقول هاسيبهم فى البيت جعانين لحد ما يروحوا الجنة
***
ما علينا
خليها شوربة خضار من غير فاصوليا
***
صدق نجيب سرور لما قال : ما أرخص فى السوق الإنسان

4 comments:

الجمعاوي الاصيل said...

السلام عليكم ورحمة الله وبركاته

الانسان ليس برخيص

اني جاعل في الارض خليفة

هذا قول الله وهل يرضى الله ان يكون خليفته رخيص

ولكن الانسان هو من يرخص نفسه

بصمته نهوانه ببعده عن الله
اليس كذلك

تحياتي

Nostalgia said...

:)

روعة با ريم

عاشقة القاهرة said...

تحفة وواقعية كعادتك
بس أنا عايزة أقول أن طول ماالناس ساكتة وبردوا بتشترى طول ما هاتفضل العلاقة بين الأنسان والسلعة عكسية هى سعرها يزيد والأنسان بدون سعر يالا منهم لله اللى بالى بالك والا أقولك أنا مقولتش حاجة خلينا ماشين جنب الحيط اللى من كتر ما مشينا جنبة هيميل علينا ويكسرنا
وحسبى الله ونعم الوكيل

Ihab the 2nd said...

صاحبة المقام العالي
اخط لك تلك الكلمات عقب اطمئناني علي طفلتي الصغيرة الجميلة التي ما ان اوت الي فراشها حتي ارسلت لي رنة علي هاتفي الجوال بما يفيد انها اخيرا بدات تنعم ببضعة ساعات من النوم الجميل
هبهبوه الامورة
اطمني يا بيبي عمرك معايا ابدا ما تشعري باي لحظات قلق او تفكير و انت في السوق
هذا وعد من بيبو اللي مخلفش ليكي وعد من ساعة ما ربنا رضي عنه و بعتك ليه يا حب عمري
بيبو