Saturday, February 23, 2008

سبع سبعات


سبع حاجات نفسى أعملها

1
نفسى أعرف أنا كويس بالليل من غير ما أسمع كل اللى بيتقال فى بيتنا بالليل
2
نفسى أشترى كل الحاجات اللى ناقصة فى تجهيزات بيتى بسرعة
3
نفسى أسيب شغل فى الشركة اللى أنا بشتغل فيها و ألاقى شغل قريب من بيتى الجديد و مواعيده تناسب ظروفى بعد الجواز
4
نفسى أخرج مع إيهاب يوم كامل من الصبح لبالليل من غير ما أقلق أو أحسب خصومات الغياب من الشركة
5
نفسى أنزل البحر
6
نفسى أروح مع إيهاب ديزنى لاند و رحلة موانى البحر المتوسط
7
نفسى أحضر حفلة لمحمد منير فى الأوبرا ليلة الكريسماس

سبع حاجات مش بعرف أعملها

1
مش بعرف أتكلم مع الناس بوقاحة و ده بصراحة بيحرق دمى كتير لأنى مش بعرف أرد على حاجات كتير بتضايقنى
2
مش بعرف أعمل حلويات على الرغم من حبى للمطبخ و لتحضير الأكل
3
مش بعرف أنام كويس و ده دايما بيوتر أعصابى
4
مش بعرف أتصل بحد فى التليفون غير لما ببقى محضرة الكلام اللى هاتناقش فيه و ده بيخلينى قليلة جدا فى الإتصال بصاحباتى
5
مش بعرف أتابع خطوط الموضة و الأزياء الجديدة ولا الأفلام التافهة ولا أخبار المغنيين الجدد و ده بيخلينى وسط الناس زى أهل الكهف
6
مش بعرف أمشى أمورى فى الشغل و دايما بصطدم مع المديرين بتوعى
7
مش بعرف أقول كلمة حلوة من غير ما أحسها و مش بعرف أقول كلمة حلوة لحد مش بحبه

سبع حاجات بقولهم دايما

1
يا عسل على القمر دايما بقولها لإيهاب
2
بيكفى كده لما بحس إن فى حاجة زادت عن حدها
3
عصيت لما بشوف عربية عطلانة
4
ماشى دايما بقولها فى وسط الكلام لما أبقى بحكى عن موضوع و عايزة أتأكد إن الشخص اللى بحكى له متابع
5
الناس بقت وحشة لما حد بيقولى حاجة مش بتعجبنى
6
الستات انحرفت لما بشوف بنت أو ست لابسة حاجة مش مناسبة أو مكشوفة
7
يا مٌرى لما بزهق قوى من حاجة

سبع حاجات بحبهم قوى

1
بحب أخرج مع إيهاب أشترى حاجات بيتنا
2
بحب أشترى الكتب و أروح المكتبات
3
بحب العرايس و لعب الأطفال و أفلام الكرتون و مجلة أميرات ديزنى و مجلة ميكى
4
بحب بيتى اللى هاسكن فيه مع إيهاب قوى و مشتاقة ليه جدا
5
بحب أقعد فى البيت وحدى
6
بحب أكتب لما ببقى متضايقة
7
بحب أروح مع إيهاب سيتى ستارز و بحب أتغدى فى بيتزا كينج

سبع مشكلات فى حياتى ممكن تحلها الفلوس

1
مشكلة المواصلات لأنى هاشترى عربية
2
مشكلة السايبرات لأنى هاركب خط ( دى . إس . إل ) لوحدى فى البيت
3
مشكلة الشغل فى الشركة دى لأنى ممكن أغيب براحتى من غير ما أفكر فى الخصم اللى ممكن ينزل على المرتب
4
مشكلة تجهيزات البيت لأنى كده هاجيبها أسرع و هاجيب كل الحاجات و الماركات اللى نفسى فيها
5
مشكلة أوضة المكتب لأنى كده هاجيب أحسن أوضة مكتب فى مصر فيها مكتبة من الأرض للسقف تاخد كل كتبى و كتب إيهاب و هاجيب مكتب كويس بكرسى دوار
6
مشكلة دار المدى لأنى كده هاقدر أشترى كل إصدارات دار المدى اللى نفسى فيها
7
مشكلة السلم لأنى كده هاركب أسانسير لشقتى اللى فى الدور السابع رغم إصرار إيهاب على إنها مش عالية و إنها فى الدور السادس

سبع أماكن بحبهم قوى

1
بحب الصحرا جدا و بعشق أى إمتداد صحراوى غير محدود
2
بحب مكتبى القديم فى الشركة المصرية السويسرية المتحدة
3
بحب وسط البلد من رمسيس للسيدة زينب و من جاردن سيتى للحسين و القلعة
4
بحب إسكندرية و نفسى أشبع منهاعلى قد ما بحبها
5
بحب الهرم و المتحف المصرى و القلعة
6
بحب كل أماكن و مزارات القاهرة القديمة
7
بحب حديقة الأزهر


سبع أشخاص بحبهم جدا غير بابا و ماما و إخواتى

1
إيهاب مليكى المتوج و عمرى و قلبى و الإنسان الوحيد اللى عرف يحبنى صح
2
مروة عفيفى صاحبتى نصى التانى
3
علياء بسيونى على الرغم من بعد المسافات
4
هبه صبحى جزء من مراهقتى بيوحشنى جدا
5
مس إيمان مدرسة الكيمياء فى مدرستى الثانوى
6
حماتى الجميلة أمى بعد أمى
7
فاطمة سعيد 12 سنة حب فى حب

سبع مدونات بحبهم خالص و لازم أتصفحهم أول ما أدخل أون لاين

1
مدونتى ريم البرارى المستحيلة
2
مدونة بينى و بينك أسرار
3
مدونة موجة بحر
4
مدونة مرتفعات وزرينج
5
مدونة فنان فقير على باب الله
6
مدونة فى مملكة جيرالدين
7
مدونة بنت مصرية

5 comments:

zordeak said...

ممممممممم

:)


ده brain stormingحلو اوى ال

وحلوة فكرة السبع حاجات

انا لو عملتها مكمنتش هعملها احسن من كده

:)


______________________

ملحوظة على جنب كده لينك غادة مع نفسى هوا

http://ma3nafsi.blogspot.com/

ومدونتها غنية عن التعريف طبعا

اما اللينك اللى انتى حطاه فده لينك مدونتى المتواضعة

وشكرااا

:)

عاشقة القاهرة said...

بحبك
ووحششششششششششششششششتينى أوى رغم أنى ساعات باشوفك
ربنا يحقق لك اللى نفسك فية
وأدعو لى يحقق اللى نفسى فية

Reem said...

أحمد فؤاد


متشكرة على رأيك فى التدوينة

و آشف قوى على الخلط اللى حصل بس كل الأمر إنى ماكنتش مركزة شوية و أنا بحط اللينك

و مرة تانية متشكرة بس المرة دى عشان لينك مدونة غادة


***


مروة

اللى بينى و بينك أكبر من المواضيع و التعليقات اللى بينى و بينك عمرنا اللى اتقسم بينا


ربنا يخليكى لى على طول و يخلينى ليكى


بس كده

Ihab the 2nd said...

اجاباتك تحفة كالمعتاد
و انا هعمل برضو موضوع السبع سبعات دا في مدونة بيني و بينك اسرار زي ما اتفقنا دلوقتي

fatma said...

عيني دمعت لما لاقيتني في فلبك من ضمن 7 عارفه ده كتيييير اوي بالنسبة لي يسعدني أوي أوي
حاسيت كده كأني كنت مقطوعة وماليش حد ودلوقتي بس لقيت حاجة حضنتني ودفتني ونيمتني وطبطبت علي بقالي زمن مش حسيت الاحساس ده
ربنا يخليكي لي
وتخلصي جهازك وتجييبي احسن حاجة وانا كمان
انا مش محتاجة اكتب سبع سبعات لأنهم هايبقوا نسخة طبق اللأصل من اللي نفسك في
باحبك تاني