Monday, January 21, 2008

... عايزة


هو أنا لو وقفت فى وسط الشارع صرخت بأعلى صوتى و بدأت أشتم كل حاجة إيه اللى ممكن يحصل ؟

حاسة برغبة قوية جدا فى إنى أصرخ و أشتم

عايزة أشتم الشوارع و الأتوبيسات و عربيات الميكروباص و محلات البقالة و أفران العيش

عايزة أشتم زملائى فى الشغل و مدير الحسابات و المدير المالى ومديرة المكتب و الساعى و مكتبى بالمرة

عايزة أشتم سريرى اللى مش بعرف أنام عليه و مخدته اللى زى الحجر و دولاب هدومى كمان

عايزة أشتم جيرانى الأغبياء و أفراحهم المزعجة و كل أجهزة الـ DJ اللى فى العالم

عايزة أشتم إرتفاع الأسعار المجنون و إحساسى بإنى بجرى لما نفسى ينقطع عشان ألحق أشترى أى حاجة قبل ما تغلى و برضة مش بعرف

عايزة أشتم النظرات المتحجرة اللى فى عيون الناس و قسوتهم و غباءهم

عايزة أشتم أى حد يسخف مواقفى أو يسفه آرائى لمجرد إنها بتختلف عن مواقفه أو آراؤه

عايزة أشتم وجع ضهرى و رقبتى و كل الأدوية اللى ما بقتش بتجيب أى نتيجة

عايزة أشتم الآراء الغبية و القرارات المتخلفة اللى بيتدخل بيها كل اللى حواليه فى حياتى و كأنى لسه قاصر و مش أملك حق إتخاذ قرار فى حياتى

عايزة أشتم كلام الناس السخيف و قلة أدبهم و سفالتهم و تدخلهم فى اللى مايخصهمش

و عايزة أنام

عايزة بعد ما أخلص كل الشتيمة دى أنام

محتاجة أنام قوى

و الله نفسى أنام

بحس كل يوم كأنى بيغمى عليه فى السرير

و أنا محتاجة نوم مش إغماء

محتاجة أحس بالراحة

و الله العظيم تعبانة و محتاجة أستريح و كمان مش عايزة و مش قادرة أفكر

يا ربى محتاجة أنام حتى لو فى الشارع و جنب الحيط

بس أنام

راسى بتوجعنى و الصداع بدأ يرجع تانى

و أنا تعبت قوى

تعبت و محتاجة أنام

كأنى بقالى 20 سنة مش بنام

يا رب عايزة أنام

يا رب أعرف أنام

يا رب تعبانة قوى



2 comments:

Ihab the 2nd said...

انا اسمي مكتوب
لا
طيب الحمد لله
ايه الكلام دا بس يا بيبو .. يعني جاية في اخر المشوار و تقولي تعبتي
ما خلاص .. المسائل بتتلم و بعد عملية امي هيبقي في كلام نهائي بخصوص الخطوة قبل الاخيرة
و بعد كدا اجازة طوووووووويلة من كل شئ
تقعدي انت بقي علي النت و انا اقعد اقرأ مؤلفات الكابتن جابرييل ماركيز
و بالمرة اقرأ ما لدي من كتب لما اقرأها بعد خاصة كتاب مدافع اية الله .. عليه اهداء تحفة
بس التدوينة دي كويسة .. كويس ان الواحد يفرغ ما بداخله بالشكل دا و يريح اعصابه ..
سبي .. سبي يا اختي برحتك احنا هنخبي .. ما كلنا بنسب الكلام الفارغ .. الهواة .. الهواة المنتشرين في كل مكان
تدخلي الميكروباص تلاقي الهواة
تركبي الاتوبيس تلاقي الهواة
تفتحي المدونات و المنتديات تلاقي الهواة
تفتحي الحنفية تتساقط منها الهواة
زهقت هواة بقي
عموما الاجازة قربت
و سوف تحظين باجازة لم يحظ بها ايا من بني بشر قط
هذا وعد
هذه مسئوليتي

ست المرتفعات said...

والله يابنتى انا ممكن اقف جنبك واشتم معاكى
بس اتحمل ياجميلة
هانت اهه على حسب كلام هوبه

خد بالكم من بعض ياولااااااد


لولا