Tuesday, July 10, 2007

تاجات .. تاجاااااااااااااات


دى أسئلة لأكتر من تاج أتمرروا لى الفترة اللى فاتت
تاج من عليا و تاج من دافنشى و تاج من عمرو عز الدين
هارد على تاج عليا و تاج عمرو من بعض لأن أسئلتهم قريبة من بعض
و بعد كده هارد على تاج داف

***

استعنا على الشقا بالله

***

س : هل فكرت فى إغلاق المدونة .. و السبب ؟


آه .. فكرت فى الموضوع ده كتير جدا
السبب إن اللى بيقرا كتاباتى فى المدونة دى كأنه بيبص على أدق خلجات روحى من جوه ، و فى فترة ما ده كان شئ مؤلم جدا بالنسبة لى ، و حقيقى هو مازال كده بالنسبة لى بس مقدرش مش أرد على حد ساب لى تعليق و الدايرة بتستمر

س : صورتك فى المدونة.. رمزيتها ؟

هى من وجهة نظرى صوة أنثى شديدة الأنوثة
رأيى فى نفسى يعنى

س : طبيعة كتابتك فى المدونة بشكل عام.. سياسة.. قصة.. عبث.. كلام فاضى ؟

بتكلم عن نفسى بشكل رئيسى
بتكلم عن أى حدث أو أحساس أو شعو يمر بيا
بتكلم عنى

س : لماذا تدون أصلا ؟

عشان بحب أشوف كتاباتى على شاشة الكومبيوتر

س : أحلى جملة قيلت لك فى وصف مدونتك ؟

هى جملة أنا قلتها فى مناقشة عن مدونتى مع صديق
و قلت له إن مدونتى هى المدونة الأكثر أنوثة فى كل المدونات اللى أنا شفتها

س : التعليقات بالنسبة لك.. أهميتها ؟

الرد عليها إلتزام بالنسبة لى

س : أفضل مدونة قرأتها.. يمكن اختيار عدة مدونات

مش أقدر أحدد الأفضل بالنسبة لى لأن ده بيخضع لحالتى المزاجية
بس أقد أقول إن المدونات اللى وصلتها موجوده فى مدونتى هى الأفضل بالنسبة لى

س : حد قل أدبه فى التعليق.. إيه رد فعلك ؟

هارد عليه و هامسح بيه بلاط المدونة طبعا

س : أسوأ مدونة الاجابة اجبارية يمكن اختيار عدة مدونات هما كتير اصلا ؟أسوأ مدون مهو هتجاوب هتجاوب؟أسوأ بوست؟

مقدرش أحدد بالضبط
بس أنا إن أى مدونة بتتناول الكلام عن الجنس بشكل مقزز هى الأسوأ من وجهة نظرى

س : اسمك ؟

هبه عبد العليم

س : اسم الدلع المشهور وسط أصحابك ؟

ريــــــــــــــــــم
أعتقد إنه واضح

س : عمرك ؟

نهاية أكتوبر الجاى هاكمل الــ 26 سنة
بس

س : برجك ؟

العقـــــرب

س : مجال دراستك ؟

حسابات
مدين و داين طول اللنهار
الله يصبرنى

س : شخصيتك نوعها إيه ؟

مش عارفة
ناس بتقول حادة قوى
ناس بتقول ناعمة قوى
و ناس بتقول رقيقة و ناس بتقول متوحشة
بس أنا شايفانى إنسانة بس بدون تصنيف

س : السفر بالنسبة لك إيه ؟

أمنية هاتتحقق قريب

س : المود بتاعك ؟

دايما عندى صداع

س :وقت فراغك بتعمل فيه إيه ؟

مش عندى وقت فراغ
بس لو موجود هنام لأنى دايما مرهقة

***

دى الأسئلة اللى أنا جاوبتها من تاج عليا و عمرو عز الدين
و بعتذر عن عدم الاجابة على الباقى لأنى سبق و جاوبت عن نفس الأسئلة

***

تاج دافنشى

***

الرحمة يا رب

***

س : لما بتشوف واحدة جميلة قوي بتشيل عينك بعد قد إيه؟

مش بسرعة طبعا
ده أنا بجيبها من فوقها لتحتها عشان أعرف المواد اللى هى متركبة منها

س : لو لك 3 أمنيات هيتحققوا.. هيكونوا إيه؟ بس حاجة خاصة بك أنت

أتمنى أعرف أنام كويس
أتمنى أتجوز من راجل بحبه
أتمنى أسمى بنتى بهية

س : آخر مرة بكيت؟

من قريب لما جرحت إنسان بحترمه جدا
يا رب يسامحنى

س : إيه أكتر حاجة بتحبها في نفسك؟

كل حاجة طبعا
ده أنا مفيش منى اتنين

س : أكتر حاجة بقى بتكرهها في نفسك؟

مفيش طبعا
أنا لسه كنت بقول إن مفيش منى اتنين

س : أسوأ حاجة عملتها

مفيش أسوأ
لأن مصايبى كتير
مش بقيت يقيم

س : مبادئك.. ثابت عليها؟

المبادئ مابتتجزأش
لو مش ثابتة عليها مش هاتكون مبادئى

س : لو رجع الزمن بيك مين الشخص اللي تختاره أنك متقابلوش؟

مفيش
كل الناس اللى عرفتها و كل التجارب اللى خضتها حتى المؤلم منها أفادتنى و أضافت لشخصيتى
أنا بشكر كل الناس اللى آلمونى فى حياتى لأنى منهم اتعلمت ابقى أقوى

س : لأي مدى ممكن تضحي ؟

لآخر نقطة فى دمى
بس المهم إنى أكون مقتنعة بجدوى التضحية دى و بإن الإنسان اللى هاضحى عشانه يستحق التضحية دى فعلا

س : بتبكي من غير سبب؟

زمان كنت
دلوقتى لأ

س : أنت قوي؟ في تصنيفك لنفسك

قوية جدا و بثق فى نفسى ثقة مش ليها أى حدود

***

شكرا يا جماعة
مانجيش ليكم فى حاجة وحشة


8 comments:

Ihab the 2nd said...

كلما قرأت تدوينة في مدونك تزداد قناعتي بحتمية اعتزال التدوين و ترك هذا الامر لــ اصحابه ..
التلقائية .. الكتابة عن النفس و كيفية التعبير عن الذات بدقة دون غرور و اعتدال دون زيادة ..
انتي عارفة اني عارف كل الاجابات دي و كان ممكن اكتبها مكانك .. بس لما اقرأ ما اعرف فحتما له متعة اخري غير متعة ان اسمعه منك و اراه فيك
الرحلة اللي بتحلمي بيها باذن الله سوف تتحقق قريبا..
و سعيد بحق علي تغيير المسمي تحت اسم ريم البراري المستحيلة الي " بقي لي بيت " .. سعيد سعيد سعيد سعيد الي اقصي درجة
اجلس الان الساعة الثانية تقريبا بعد منتصف الليل اكتب هذا الرد و في رأسي اشياء كثيرة انت تعرفينها جيدا و سوف اكتبها لك في رسالة عي الميل ..
تصحبين علي خير .. و احلام سعيدة لــ انسانة برئية في زمن ملئ بالوحوش و الانانية و عدم الفهم لــ روحك الطاهرة الشفافة النقية
حتي اخر العمر .. ايهاب

مريم يحيى said...

ريم .. زرت مدونتك العديد من المرات بالفعل ، لكني لم أكن أتجرأ و أرد في أي مدونة - و لا أعلم لذلك سببًا ..

لفت نظري ردك على سؤال(س : لما بتشوف واحدة جميلة قوي بتشيل عينك بعد قد إيه؟) .. إجابتك كانت :ده أنا بجيبها من فوقها لتحتها عشان أعرف المواد اللى هى متركبة منها.. معنى كلامك إن مفيش واحدة جميلة في الدنيا يا حبى ؟؟

برضو رد دافنشي على نفس السؤال ماعجبنيش ، بس الكلام على رده مش هنا بقى ..

سي يو ليتر يا حبي ؛)

!!

high hopes said...

متميزة يا هبة..
وفريدة من نوعك.. مفيش شك..
ردودك جميلة..
تحياتى ليك..

Reem said...

إيهاب

كالعادة بترفع معنوياتى للسما

ربنا يبارك لى فى عمرك

و ..... دمت لى حتى نهاية العمر


***

مريم العزيزة جدا

أنا مبسوطة إنى لأول مرة ألاقى ليكى رد هنا .. يا رب دايما

شوفى يا مريم

أنا من وجهة نظرى طبعا الجمال حقيقى و موجود و ممكن تلمسيه لما تتأملى بهدوء أى شئ ربنا خلقه

فى طبعا بنات كتير جدا جميلات
انتى عارفة إن الجمال اللى ربنا خلقه مش بينتهى
و الجمال ده لما بتشوفيه لازم ترفعى عينك للسما و تقولى سبحان الله

بس الجمال اللى السؤال كان بيتكلم عنه هو الجمال المصنوع

الجمال المكون من السيليكون و مستحضرات الجميل و خارج من بين ايدين الكوافير و أطباء التجميل

عشان كده أنا لما بشوفه بس بحب أعرف الخلطة و المكونات و المقادير

بس يا مريمتى

سى يو ليتر

***

سارة

متشكرة قوى

أخجلتم تواضعنا

Merci

واضح إنك متابعة مدونتى من زمان


أتمنى أشوفك دايما هنا معايا

مريم يحيى said...

ريم، أو هبه .. زي ما تحبي:

كسفتيني بردك الجميل جدًا..

عقليتك ممتازة و متميزة يا هبه/ريم..

تأكدي إنك صح ؛)

إن شاء الله أنا هنا علطول

..

Reem said...

مريمتى

إتنى و الله اللى كسفتينى بردك و برقتك دى


متشكرة قوى يا مريم


على فكرة ممكن هبه أو ريم
الاتنين واحد
إختارى انتى


و طبعا وجودك ينور المدونة

Davinci said...

ريم..
مش ممكن!
ردودك جميلة بجد..
فيه كما رد يتبرروزا فعلا!

"مش بسرعة طبعا
ده أنا بجيبها من فوقها لتحتها عشان أعرف المواد اللى هى متركبة منها"
تعبير راااائع فعلا!

لا.. وكمان الإجابة دي:

"س : إيه أكتر حاجة بتحبها في نفسك؟

كل حاجة طبعا
ده أنا مفيش منى اتنين "

هلكت من الضحك!
توقعت حاجة زي دي.. بس تعبيرك تحفة بجد!

يا مغرورة (وش بيطلع لسانه)
طحياطي

Reem said...

دفدف

يا أهلا بالمعارك

طبعا لازم ردودى تتبروز

إنت بتتكلم فى ايه ؟

منطقى جدا إنى لازم أجيبها من فوقها لتحتها

كل البنات بتعمل مع بعض كده

أماال إنت فكرك إن الموضة بتنتقل إزاى ؟

بس أنا فعلا بيلفت نظرى موضوع الجمال الصناعى ده

ما علينا

ثم عايزة أعرف ليه مستغرب موضوع إن مفيش منى اتنين ده على الرغم من إنك عارفة من زمان

ما علينا

كنت مبسوطة كتير بردك

آه لو قلت تانى إنى مغرورة هاطير رقبتك

اتفقنا ؟

اتفقنا