Monday, June 4, 2007

تعبت

حياتى فيها تفاصيل صغيرة
تفاصيل ربما تكون صغيرة قوى ، بس هى اللى بتدى حياتى معنى
خروجة مع حد قريب لقلبى
بار شيكولاتة كبير أغرق فيه مع نفسى
فيلم حلو فى السينما
أغنية جميلة تحترم عقلى و مشاعرى
وقفة طويلة تحت الدش فى شاور أنسى فيه نفسى
تفاصيل حلوة كتير
حتى التفاصيل العادية برضة بتدى حياتى معنى
يعنى شعبطة الأتوبيس الصبح عشان أوصل مكتبى
مج النسكافية أو فنجان القهوة فى المكتب
اللف و شرا لوازمى و لوازم البيت من السوبر ماركت
بس دلوقتى حاسة بملل فظيع من كل تفاصيل حياتى
كل التفاصيل أتحولت فجأة لشئ قمئ و ممل و مثير للتقزز
إحساس رهيب بالإختناق من كل شئ بيسيطر على مشاعرى و مش عارفة أروح منه فين
تعبت
تعبت قوى
عايزة أتخلص من كل تفاصيل و علاقات حياتى و ارجع إنسانة بدون أى إرتباطات بأى شئ أو بأى حد
ملفات كتير مفتوحة و عايزة تتقفل ، بس أنا مش قادرة أعمل أى حاجة
مخنوقة و تعبانة و حاسة بملل
لزوجة الصيف بدأت تدمر روحى و الإكتئاب بياكلها و مش عارفة أهرب لفين
تعبت
تعبت قوى
نفسى أنام بهدوء
نفسى الصداع يروح
نفسى أعيش من غير مهدئات و مسكنات
حتى جسمى بدأ يتمرد علىّ و يتألم
ألم فظيع فى جسمى كله و بقع زرقا كتير مش عارفة سببها إيه
نفسى أنسى كل شئ
اسمى
هويتى
شغلى
علاقاتى
ارتباطاتى
نفسى أتحرر من معرفة أى شئ و أى حد
نفسى حتى أتحرر من الحياة
***
يا الله يا ولىّ الصابرين
صبرنى
يا الله يا رحمن يا رحيم
أرحمنى
ارحمنى يا رب من نفسى
يا رب انا أضعف من إنى أتعذب بنفسى
رحمتك يا رب


2 comments:

Ihab the 2nd said...

بقالك فترة مش انتي
ارجوكي انا معاكي .. بلاش تعذبي نفسك كدا .. لو اخذتي اي قرار بخصوص اي شئ في الدنيا حتي بخصوص صداقتك لــ ايهاب نفسه قولي لي عشان انا نفسي اساعدك علي العبور بسلام في هذا القرار
لا اريد ان اكون رقما في قائمة احزانك
او رقما في قائمة من ضايقك
او رقما في قائمة جروحك
ارجوكي .. دعينا ننجز سويا عبور تلك المرحلة من الاحزان .
انتي تعرفيني .. لا اعرف تشغيل اسطوانات مشروخة او جمل مفبركة .. ما لدي اقوله لك فورا .. صدقيني صديقك يريد مساعدتك بشدة .. مفيش داعي لكل هذا الكم من الاحزان
مستحيل يكون اللي موجود الان العن من اللي فات .. كله بيعدي
دا كلام مؤقت في المدونة و اغلب الظن سوف تعرفينه قبل ان تقرأي هذا الرد
حتي نهاية العمر ايهاب .

Reem said...

إيهاب


دمت لى حتى نهاية العمر