Thursday, May 17, 2007

26

النهاردة عيد ميلاد سارة صاحبتى
كملت 26 سنة
كمان أنا بعد 6 شهور هايكون عندى 26 سنة
بعد ما قلت لسارة كل سنة و إنتى طيبة قعدت أفكر فى حالى
فى عمرى
حسيت إنى صغيرة قوى على 26 سنة
امبارح بس كنت فى محل لعب أطفال و بلعب ، إزاى النهاردة عمرى 26 ؟
فكرت فى عمرى و حسيت إنه فعلا اتسرق منى من غير ما آخد بالى
آه .. عشت
حبيت و اتحبيت
خرجت و شفت ناس و عشت تجارب
ضربت و اتضربت
وقعت و قمت أكمل
تهت و عرفت طريقى
بس برضة حاسة إن عمرى اتسرق منى
كأنى مربوطة فى الأرض و كل اللى حصل إنى كنت بدور حوالين نفسى فى نفس النقطة
ببدأ من مكان ما انتهيت
و بنتهى من مكان ما بدأت
و بلف و السنين بتلف معايا حوالين نفس النقطة
مش عرفت أفضل الطفلة اللى بحبها و اتمناها
ولا عرفت أكبر و أكون امراة بدون "عقدة العودة إلى الطفولة" زى سعاد حسنى
و تعبت
اتمنى إن اللى جاى يكون أحلى و أجمل
عشان باقى العمر كله مايروحش هدر
و تتسرق منى سنينى

6 comments:

A.SAMIR said...

من حظي الحلو ان اول مرة ازور فيها مدونتك يكون عيد ميلادك
مدونة جميلة...وان شاء الله يكون عيد ميلادك ال126 وانتي لسة بتكتبي في المدونة دي
تحياتي واحتراماتي

Reem said...

a . samir

هو من حظى أنا الحلو إنك زرت مدونتى و سبت فيها رد بشكرك جدا عليه

بس للأسف النهاردة مش عيد ميلادى هو عيد ميلاد سارة صاحبتى اللى خلانى أفكر فى عيد ميلادى

بشكرك بشده على المرور و على النهنئة

على فكرة

مدونتك أكتر من رائعة
عجبتنى كتير

Davinci said...

الله يجازيكي يا ريم.. كلامك كالعادة كنت عايز اقوله.. لكن اظن اني باهرب منه..
للأسف هذا هو إحساسي في عذع المرحلة.. كما يقول سيد حجاب:
وينفلت من بين إيدينا الزمان، كأنه سحبة قوس في أوتار كمان...

Nostalgia said...

كان عيد ميلادي من كام يوم..
فكرت كدة بجد
لقيت عندي 19 سنة ..
عارفة ..حالة ذعر غريبة ..انا كبرت ..
ومش تهريج المرة دي ..دا احنا بنتكلم عن 19 سنة ..
عارف ان العمر دا جايز يكون سخيف بالنسبة ل 25 او الحاجات الي باينه بعيدة اوي دي ..
بس انا كانت 19 سنة بعيدة اوي عني برضة
مش عارف ..ساعتها قلت لنفسي حاجة غريبة اوي ..
مش عارف بالمناسبة مين الي قال أن أصدق أنواع الحكم هي أسخفها يمكن انا والله..
لقيت نفسي بقول : أنا بكبر ..

الحقيقة العلمية هي إننا فعلاً بنكبر ..

Amr Ezeldeen said...

فكرتينى ليه بس يا ريم..

أنا كمان كلها شهرين و أكمل الستة و عشرين..
كنت زمان لما أكمل 18 أقول للعيال صحابى إنى خلاص كبرت و بقى عندى 19 سنة.. باعتبار إنى دخلت فعلا فى التسعتاشر..
و كل سنة بأزود عليها سنة.. لغاية لما لقيت نفسى داخل على الستة و عشرين.. لقيت نفسى بأقول لكل اللى حواليا أنا عندى 25 بس..
مش بس عمرى اتسرق..
لا ده ضحك عليا و خلانى كبرت نفسى بدرى بدرى
يلا
كل سنة و إنتوا طيبين

Reem said...

دافنشى

الله يجازيك يا محمد

كالعادة بتحرجنى بكل ردودك

سننا بيسرقنا مش بيتسرق منا

ماتسيبوش يفلت


****

د / أحمد

إنت فعلا لسة صغير على الكلام ده

و على كل حال لسه قدامك 7 سنين مش من حقى أتكلم عنهم

ألحقهم فعلا قبل ما تخسرهم بشكل نهائى


****

عمرو

أولا : أهلا بيك فى مدونتى

ثانيا : تستاهل اللى عملته فى نفسك

و إنت طيب و البقية فى حياتك