Sunday, April 29, 2007

تاج من فوق مرتفعات علياء

ـ دائما ما تطالب المرأة بالحصول على حريتها ، فما مفهوم الحرية عند المرأة ؟
ـ أنا مش أقدر أحكم على مفهوم الحرية للمرأة بشكل عام ، بس بالنسبة لى مفهوم الحرية يتضمن حرية الفكر و الأعتقاد
حرية اتخاذ القرارات و حرية الإختيار بين البدائل المختلفة
بشكل عام حرية السلوك اللى يخلينى كائن مستقل مش تابع
ـ متى أحسست بنفسك خائنة ؟
ـ الحمد لله عمرى ما حسيت بالإحساس ده
بس ممكن أحسه لو عملت شئ يخالف إعتقادى و قناعاتى الفكرية
ـ هل يمكن أن تحب المرأة رجلين فى نفس الوقت ؟ نقول الحب و ليس الإعجاب
ـ لأ طبعا
أصلا المرأة لما بتحب مش بتشوف أى رجل فى الكون كله غير حبيبها
ـ إذا خذلك لعديد من المرات ، هل تستمرين معه فى علاقة مستقرة ؟
ـ لأ ... لأنى عمرى ما هاحس إنه سند و أمان بالنسبة لى
و إذا ماكانش هو أمانى ، عمرى ما هاحس معاه بالإستقرار
ـ ماذا ترتدين فى أول لقاء مع حبيبك بالوصف التفصيلى ؟
ـ أى حاجة ممكن تخرج فى إيدى من الدولاب
أكيد شخصيتى أهم من لبسى فى مو قف زى ده
ـ ما هى أول فكرة ترد إلى ذهنك فى اللحظات الأولى بعد دخولك " المحظور " ؟ ... لا توجد خيارات للإجابة
ـ يعنى إيه المحظور ؟
لو السؤال واضح هاجاوب بدون تردد ، بس السؤال مش واضح
ـ سؤال بالعربية الفصحى إلى العربية الفصحى ، أيعقل أن تكون هيفاء وهبى هى نموذج المرأة العربية من المحيط إلى الخليج ؟ و ماذا يمكن أن تفعلن لتغيير هذه الصورة ؟ و كيف بإمكاننا أن نساعدكن ؟
..................... مش فاهمة مين اللى بيسأل و بيقول إنه هايساعدنا
لو هو حد شايف إن هيفا هى نموذج المرأة يبقى مايستحقش مجهود تغيير الصورة و أصلا يبقى أقل من مستوى المناقشة معايا ، و لو هو حد شايف إن هيفا مش هى النموذج يبقى مفيش مجال للسؤال
ـ إذا عجبك شاب إزاى بتجربى تلفتى له انتباهه ؟
ـ بتجاهله تماما ، و هو هاييجى على جدور رقبته فى الآخر
كلهم بييجوا على فكرة
ـ إذا عجبك شاب و مابادلك الإعجاب ، بتعملى ايه ؟
ـ بخرجه من حساباتى
مش طالبه حرقة دم بصراحة
ـ فى مرشد بيقول إن البنت بترغب فى الشاب طالما إنه بيشكل تحدى بالنسبة ليها ، ايه رأيك ؟
ـ ده مرشد عبيط مش يعرف البنات كويس
ـ هيفاء وهبى ، شادية ، فاتن حمامة : مع من تتماهين أكثر و بصراحة بدون مثاليات ؟
ـ فاتن حمامة طبعا
نموذج للمرأة الهادية .. العاقلة .. الواثقة .. قوية الشخصية
ـ انتقى شخصية رجالية معروفة تتمتع بالكاريزما من وجهة نظرك و تكلمى عنها
ـ الكاتب يوسف إدريس
كتاباته بتجننى ، بحس إنه نموذج للرجل المثقف الواثق القادر على الإحتواء
تحديدا ، بحس إنه النموذج اللى ممكن أقيس أى رجل آخر عليه
ـ لماذا تنفخ المرأة فى الزبادى كلما لسعتها الشوربة ؟
ـ لأن التجربة بتقتل براءة البدايات
ـ هل صحيح أن المرأة تختار الشخص غير المناسب فى فترة المراهقة و الشباب ثم تندب حظها بعد ذلك ؟
ـ هى فعلا بتختار الشخص غير المناسب فى فترة المراهقة ، بس بتتعلم تختار صح بعد كده
ـ ما هو أسوأ موعد غرامى مر بك ؟ و ما هو أكثر جزء ضايقك فى هذا الموعد ؟
ـ مفيش ميعاد ممكن أقابل فيه حبيبى و يكون وحش أو تكون فيه حاجة ممكن تضايقنى
ـ ذكرى و ظروف أول قبلة ؟
لسه مفيش .. بس هاعدل الإجابة لما تحصل
ـ هل تقبلين باستمرار العلاقة التى تربطك بشخص ( زوج أو حبيب ) فى حال مات الحب بينكما ؟
ـ لأ ........... لو الحب انتهى يبقى كل شئ منتهى
مفيش أى شئ بعد الحب ممكن يربط بين رجل و امرأة
ـ هل يستحق الرجل التضحية بكل شئ من أجله و البدء معه بحياة جديدة تبدئين فيها من الصفر ؟
ـ لو كان رجل حقيقى فهو يستحق التضحية بكل شئ و البداية من الصفر
و ده مش هايكون عشانه بس ، لأ كمان عشان أنا أفضل جنبه و معاه فى أى مكان و فى أى ظروف
ـ لماذا تدعى أغلب النساء أنهن لا يجدن الطبخ ؟
عشان الرجل اللى ممكن ياخد النقطة دى ببساطة هايكون بيحبنى بجد مش عايزنى جارية للطبيخ و الغسيل و المسح
بس أنا عن نفسى أمنية حياتى ، بس أقف فى المطبخ أحضر الغدا لحبيبى
***
ـ هل تسعد عندما يمرر لك أحدهم تاج ؟
ـ آه بكون مبسوطة و بحس إنى فى بالهم
ـ هل مقدار سعادتك أو شعورك أيا كان عند تمرير التاج لك يختلف حسب المدون ؟
ـ آه بيكون سعادتى أكبر لما برد على تاج من حد من أصحابى
ـ هل تستمتع عند إجابتك على أسئلة التاج ؟
ـ بستمتع جدا لأنى بكون بتكلم عن نفسى
ـ هل ترى للتاج أهمية حقيقية ؟
ـ آه ... بيعرف المدونين حقايق شخصية عن بعضهم البعض
ـ هل فكرت فى عمل تاج خاص لك من قبل ؟
ـ لأ
ـ هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط ؟
ـ آه .. بحب أقراها و بهتم بيها زى التدوينات التانية بالظبط
ـ عندما ترد على تاج ما الذى تراعيه أكثر ؟
ـ الصدق و الوضوح
ـ هل تحرص على قراءة إجابات من تمرر لهم التاج ؟ و هل تغير إجاباتهم للتاج شيئا فى إدراكك لهم ؟
ـ آه طبعا بقراها ، و إجاباتهم بتوضح لى جوانب مهمة من شخصياتهم ، فأكيد بتغير من إدراكى ليهم
ـ هل تلتزم حرفيا بأسئلة التاج ؟
ـ مش دايما
ـ ما هى نوعية التاجات التى تفضلها ؟
ـ التاجات اللى بتسأل فى أمور شخصية بس مش خاصة ، لأنها بتعرفنى على جوانب مش أعرفها عن بعض المدونين و كمان لما بجاوبها بتعرف أصحابى على جوانب مش يعرفوها عنى

No comments: