Sunday, March 18, 2007

عند آخر الدنيا


هو العادى و الطبيعى إنى أكون عايشة لوحدى ؟
حاسة بإحساس فظيع و قاتل
حاسة بمرار مذهل ، كأنى شربت 100 فنجان فهوة سادة
حاسة إنى لوحدى قوى
وحيدة أكتر ما أقدر أتخيل أو أتحمل
جربت أعيش بكل الطرق
و مع كل الناس
حبيت
ارتبطت
اتخطبت
و كونت صداقات كتير جدا
صداقات مالهاش حصر
و كل حد من أصحابى كنت مخلصة معاه تماما
و إديتله ـ بس ـ حته من روحى
كل واحد من اللى عرفتهم عنده حته من روحى
و محدش منهم أبدا قدر يملا فراغ روحى
روحى اللى حاسة كأنى فرقتها بين القبايل
و مابقاش ليها دية
ناس كتير قوى دخلوا حياتى و خرجوا منها
و فى الآخر أنا وحدى
آه يا ربى
مش عارفة أعمل إيه ؟
مش عارفة هاوصل لفين ؟
كأنى جاية من بعيد و لسه رايحة بعيد
المشوار طويل
و مكان الوصول مجهول
و أنا لحالى
لحالى قوى كأن الدنيا مش فيها حد غيرى
خايفة ؟
لأ .. مش خايفة
مش عندى حاجة أخاف منها أو عليها
نفسى أوصل لآخر الدنيا
أقعد على الأرض و أسند ضهرى عليها
آه
نفسى أسند ضهرى على آخر الدنيا
ممكن بس وقتها أحس إنى وصلت لآخر مشوارى
ممكن وقتها أعرف أنام كويس
ممكن كمان ألاقى هناك حد تانى ساند ضهره على أخر الدنيا و ساعتها ممكن نكمل حياتنا سوا
ممكن ؟
أعتقد ممكن

6 comments:

مصـطفي يحيـي said...

إية يا بنتي دة مش ممكن بجد ؟
كل المشاعر دي
بس مش يمكن لو وصلتي أخر الدنيا ، تتمني ترجعي لأولها تاني ..
وبعدين لسة حتستني لحد أخر الدنيا ..
إية الصبر دة ؟
وبعدين كل أصحابك عندهم حتة من روحك .. ؟
يا بختهم ..
علي كدة لو جمعوا نفسهم .. حيكونو ريم تانية ؟
بهرج طبعا ..

بس أنا كنت عايز أسألك سؤال .. غير السؤال اللي ماردتيش عليه في موضوع الفقمة :
أنتي هدفك إية ؟
يعني في حياتك .. تتمني توصلي لأية ..
طبعا بسأل عن الهدف الشخصي ، مش الهدف الإجتماعي ؟

بس

Reem said...

مصطفى
سؤالك مباشر زى طلقة الرصاص يا حضرة الضابط
***
هدفى إنى أكون راضية
بس راضية بأى حاجة يكتبها ربنا ، بس تعرف أحيان كتير قوى فى حياتى بتمنى إنى أعرف أنام كويس
أو إنى اتساب زى قشة على الميه
الميه بتجرى بيها و بتحركها و هى مش بتعمل أى حاجة ، لأنها تعبانة من كل حاجة

***
نفسى فى حياة هادية و مستقرة و فيها حد بيعرف يتعامل معايا و يتفهم تقلباتى المزاجية
***
كل دى أمنيات مش أهداف
***
هدفى اللى ياما صليت لربنا عشانه إنى أفضل ـ بس ـ زى ما أنا
و عشان كده ببعد هن كل حاجة أو أى حد ممكن يغيرنى

مصـطفي يحيـي said...

هممممم
تحتاجين لجلسة طويلة يا ريم ..
أسألي أصدقائي السكندريين ، عما فعلته معهم ، في تلك الليلة علي شاطئ سيدي بشر ..
***

بس أنتي محتاجة يكون لك هدف واضح ، ومحدد
لية تفضللي زي ماأنتي ؟
أنتي مش بتحبي التغيير ؟
مش عايزة تبقي صح ، مش جايز في حاجات غلط عندك ، أكيد كلنا عندنا حاجات غلط
فرق كبير يا ريم .. انك تكوني رومانسية وأنك تكوني ضائعة ..
فكري تاني ..
وصدقيني الفيزيتا بتاعتي مش غالية ..
ههههههه

تحياتي ..
وأعجابي الشديد بكل هذا الصدق والصراحة ، والبساطة

في انتظار عمل أدبي يحمل كل هذا ..

مصطفي يحيي

Reem said...

هاكون فى إسكندرية قريب

***
اعتبر إنى معزومة على شاطئ سيدى بشر ؟

هناك ممكن نناقش كل حاجة

مصـطفي يحيـي said...

طبعًا معزومة ..
شاطيء سيدي بشر بدييييع .. وجميل فعلا ..
تأكدي أنك هتشوفي أسكندرية كما لم تريها من قبل .

يا ريت فعلا تقوليلي أول ماتفكري ف السفر ..

جاية أمتي بقي .. ؟

Davinci said...

"نفسى أسند ضهرى على آخر الدنيا" أعجب.. وأجمل أمنية سمعتها في حياتي..