Thursday, March 22, 2007

حوار




أنا : مالك فيكى إيه ؟
أنا : مش عارفة
أنا : يعنى إيه مش عارفة ، كده هاتقلقينى عليكى
أنا : لأ و حياتى ما تقلقى
كفاية قلق كل اللى حواليه
مش ناقصة قلقك إنتى كمان ، ده هايكسرنى
أنا : طب ممكن تهدى كده و تحكيلى بهدوء فى إيه
أنا : حاضر
أنا : يلا يا حبيبتى اهدى
قدامك فنجان القهوة بتاعك اللى أنا عملتهولك و بار شيكولاتة جالاكسى ليكى مخصوص
عايزة حاجة كمان ؟
أنا : لأ ، متشكرة
ربنا يخليكى ليه
بس عايزة أسمع مفترق الطرق كمان
أنا : حاضر يا حبيبتى
عايزة حاجة كمان ؟
أنا : لأ ، بس خليكى معايا ، مش تسيبينى
أنا : حاضر يا حبيبتى ، معاكى
مش هاسيبك أبدا
أقدر أعرف بقى فيه إيه ؟
أنا : مفيش ، بس حاسة إنى لوحدى و كنت عايزاكى تقعدى معايا شوية
أنا : طبعا يا حبيبتى معاكى و مش هاسيبك أبدا
بس عايزاكى تكونى واثقة فى ده تماما
أنا : آه واثقة ، أنا لو مش بثق فيكى عمرى ما كنت هاجى أترمى فى حضنك أو اتكلم معاكى
أنا عارفة إنى مش ليه حد غيرك
أنا : ربنا يخلينا لبعض و مع بعض على طول
حد مضايقك ؟
أنا : لأ ، بس إنتى عارفة الإكتئاب مابيرحمش
و أنا لما بحس بيه مابحبش أقعد وحدى
فجيتلك على طول
أنا : و أنا دايما معاكى
أنا : تعرفى كنت لسه بفكر فيكى النهاردة الصبح برضة كنت خايفة من الإكتئاب لحسن ييجيلك
قلت أجيب اكتئابى و آجى أنا أحسن
تعرفى على الرغم من إنك معايا دايما
و باخد بالى منك دايما
بس تعرفى بخاف عليكى كتير قوى
بخاف عليكى من أى حد و ساعات بخاف عليكى منى
أنا : إنتى هاتقوليلى على نوبات جنانك
بس برضة بخاف عليكى وقتها
أنا : ما علينا
المهم بقالنا كتير ماخرجناش مع بعض
و كنت عايزة أخرج معاكى
تحبى تروحى فين ؟
أنا : و هو فى غيرها ؟
وسط البلد طبعا
أنا : نشترى كتب جديدة
أنا : آه و نلف هناك شوية
أنا : و نتعب من اللف فنروح نريح و نشرب عصير فى البستان
أنا : بس بعد ما نعدى على المول نتغدى الأول
أنا : وحشتينى قوى
أنا : و إنتى كمان و وسط البلد
أنا : خلاص نخرج بكرة
أنا : موافقة على بكرة
أنا : خلاص نتقابل بكرة
خدى بالك من نفسك
أنا : و إنتى كمان
مع السلامة
أنا : مع السلامة


5 comments:

مصـطفي يحيـي said...

براااااااااااااااافوو

برافو ياريم
هذا الحوار ، أستطيع أن أطلق عليه ،عمل أدبي، وقوي كذلك ..
بجد ، الله ينور ..
الحوار لذيذ جدًا ، حالم جدًا ، متكور علي نفسة جدًا جدًا ،
بجد لمس جانب خفي من اعماقي ، كنت دايمًا بخبيه حتي عن نفسي ، بس لقيت نفسي - بعد ما قريت الحوار دة - أني مش مكسوف من الجانب اللي جوايا ده ، الجانب اللي مش عارف بخبيه لية ، مع أني بحبه جدًا ..
بجد يا ريم ، لمستيني قوي ، وحسيت ان أنا اللي بتكلم ..
ممكن تسيبي إيدي شوية بقي بعيد عن الكي بورد ..
كي ألهبها بالتصفيق ؟؟

مصـطفي يحيـي said...

إحم ..
أنا بس قولت أجي .. أحدف لك التاج دة
http://7aya.blogspot.com/2007/03/blog-post_22.html

مستنيكي

بنوتة من وسط البلد said...

Reem
انا اول مرة ازورك بعد زيارتك الغالية لمدونتى

وقلت اصبح عليكي واقولك ان كلمة وسط البلد وانتى بتطتبيها حسيت انك بتنادى عليا وبتقولى اسمى :)

وسط البلد ده احلى مكان فى الدنيا
المهم روحتى البستان ؟

Reem said...

لسه ما رحتش

كان عندى شغل كتير جدا اليومين اللى فاتوا

مش عارفة أقولك إيه و أرد عليكى إزاى ، بس أنا سعيدة جدا بصباحك و متشكرة قوى قوى عليه

تعرفى

و أنا بكلمك حاسة بجد إنى فى وسط البلد
حاسة إنى فى حضن أمى

بجد
متشكرة جدا على صباح الخير و أتمنى إنها تتكرر كتير

Reem said...

مصطفى

كالعادة اشكرك كثيرا

بس كنت عايزة اعرف ليه بتخبى نفسك من نفسك ، أعتقد إن العكس هو الصحيح
لازم تتواصل مع نفسك بشكل دائم ، عشان تعرف تحب نفسك و تتصالح معايا
لازم الحوار يا حضرة الظابط

فاهمنى ؟
أعتقد إنك فاهمنى

و من فضلك مش تصقفلى كتير عشان بتكسف

OK

و طبعا متشكرة على التاج اللى مش عارفه هامرره لمين بعدى