Monday, March 5, 2007

التاج


دى أسئلة التاج
محدش مررهالى بس عجبتنى فقررت أجاوب عليها

**************
س : إيه اللى ممكن يحصل لمدونتى بعد ما أموت ؟
ولا حاجة ، مدونتى هى جزء منى
و لازم لما أموت تموت معايا
س : هل سبق و اديت الباسوورد لحد ؟
لأ طبعا
بس مرة كنت بكلم مروة صاحبتى على تواريخ لأحداث معينه فى حياتى و بعدها قلت لها إن تجميع التواريخ دى هو الباسوورد بتاعى
س : لو ايتى الباسوورد تديه لمين ؟
بس لمروة صاحبتى أو أسماء أختى
مش بثق فى حد للدرجة دى غيرهم

س : إيه هو اسمى الحقيقى ؟
هبه
على الرغم من إنى أحيانا بشوف إن ريم أصدق

س : إيه هو الاسم اللى اصحابى يبنادونى بيه ؟
ريم
أو ريما
س : عمرى ؟
عمرى 25 سنة و كل اللى بيشوفونى بيقولى إن شكلى مايزيدش عن 20
و لما ببقى فرحانة بشيل العشرين و بيبقى 5 و لما يزعل بضرب فى 4 و بيبقى 100
س : ايه هو برجى ؟
برج العقرب
أنا مش مؤمنه خالص بموضوع الأبراج
بس كل ما بقرا حاجة عن امرأة برج العقرب بلاقيها بتنطبق عليه بشده
س : شغلى ؟
بشتغل محاسبة
على الرغم من إن أمنية عمرى كانت إنى أدرس مونتاج و اشتغل مونتيرة
س : أى نوع من الأشخاص أكون ؟
أعتقد إن الإجابة على السؤال ده صعبة جدا
لأنى مجموعة غريبة من المتناقضات
رقيقة جدا و عنيفة جدا
هادية و متوحشة
متفاهمة و متصلبة فى رأيى
أعتقد إنى زى البحر بكل عنفه و رقته و عنفوانه
س : بحب السفر ؟
أنا بموت فى السفر
مجنونة بيه
نفسى ألف العالم كله و فى إيدى وردة و كتاب
بس لازم فى الآخر أرجع القاهرة تانى
مقدرش أعيش بعيد عنها
س : المود بتاعى ؟
أنا دايما
not in mode
دايما فى حاجة بتخلينى مش مستريحة
و دايما عندى صداع
س : بعمل إيه فى أوقات فراغى ؟
أصلا مش عندى أوقات فراغ
بين الشغل و الخروج و الكومبيوتر و القراية
مفيش وقت فراغ
بس لو فيه أحب اقعد فى أوضه ضلمة مع مروة صاحبتى و معايا شيكولاتة جالاكسى كبيرة بالبندق أو فنجان قهوة و اسمع أم كلثوم و هى بتغنى فات الميعاد
س : اكلتى المفضلة ؟
بعشق اللحوم
الأسماك بأنواعها
الفراخ بكل طرقها
و المكرونات
و عصير الأناناس الإستوائى
س : أخدت إيه من ماما ؟
الطيبة و البراءة
س : أخدت إيه من بابا ؟
البساطة و الإصرار على النجاح
س : أكتر 5 حاجات بكرههم ؟
الجهل
التصنع
الدوشة
البصارة
الزيارات العائلية
س : أكتر 5 حاجات بحبهم ؟
وسط البلد
السينما
جنينة الحيوانات و الهرم
القراءة
العروسة بتاعتى
س : الشغل بالنسبة لى إيه ؟
الشغل هو كل حياتى
مقدرش أعيش يوم من غير مانزل المكتب
ممكن أكون مش بحب المكتب قوى ، بس بحب شغلى جدا
الحمد لله
س : الكومبيوتر و الإنترنت بالنسبة لى إيه ؟
حياة جديدة بحمد ربى ألف مرة إن أبوابها اتفتحت قدامى
**************
طبعا مش هامرر التاج لأن محدش مررهولى
بس حقيقى كنت مبسوطة قوى و أنا بجاوب على الأسئلة دى

No comments: