Sunday, March 25, 2007

تاج جديد


أسئلة التاج اللى مررهالى شاعر إسكندرية / مصطفى يحيى
***
هل كنت طالبة شاطرة فى المدرسة ؟
فترة الدراسة كانت فترة متقلبة جدا فى حياتى
يعنى لما كنت فى ابتدائى و اعدادى كنت شاطرة جدا
لأن حياتى ببساطة ماكانش فيها غير الدراسة
كنت لسة ماعرفتش القراية و السينما و وجهات النظر المختلفة فى الحياة
بعد كده مريت بثانوية عامة غير اللى كل الناس مروا بيها
كنت بعتبرها فترة دارسة عادية جدا ، زى أى فترة دراسية مريت بيها
بس الحقيقة كانت غير كده ، من وجهة نظر عيلتى و مدرسينى أنا كنت طالبة مستهترة جدا
مش بذاكر
مش بحضر الحصص
الصبح عضو دائم فى فريق مسرح المدرسة اللى هو أصلا مشترك مع المدرسة الثانوية بنين اللى جنبنا
بعد الضهر برضة عضو دائم فى فريق مسرح قصر الثقافة
باختصار كنت بقضيها طول السنة بالطول و العرض و الإرتفاع كمان ، و ارجع أذاكر للثانوية العامة قبل الإمتحان النهائى بس بشهر واحد
مجموعى كان 81.5 % ، و كل الناس اللى تعرفنى كانت بتقول إنى لو كنت بذاكر بضمير كنت بقيت من أوائل الجمهورية
بس الحمد لله كنت مبسوطة جدا بنتيجتى و درجاتى
فى الجامعة بقى الأمور بقت أصعب ، لأن درجة الحرية اللى أخدتها فى حياتى و قراراتى بقت أكبر
آه كنت بحضر كل المحاضرات ، بس حضور تحصيل حاصل
يعنى طول النهار بين السينما و وسط البلد و التاون هاوس و معارض الفن التشكيلى ، و كتر خيرى لو آخر اليوم عديت على الجامعة حضرت محاضرة من 6 إلى 8 مساءا
و طبعا المواد البسيطة كنت بفتحها بس ليلة الإمتحان
بس كنت حريصة جدا على نجاحى ، مش حبا فى الدراسة و التفوق
لأ
بس عشان ما أسقطش فى مادة و أرجع ألاقينى مضطرة أحضرها و أذاكرها تانى
دى باختصار حياتى الدراسية
إيه كانت أحب مادة و أكره مادة ليكى فى المدرسة و الكلية ؟
فى المدرسة الإعدادى كنت بحب الرياضة جدا ، لأنى ببساطة كنت بحب مدرس الرياضة
بس هو مات و أنا فى سنة أولى إعدادى كان عمره وقتها 27 سنة
من يومها عرفت طعم لبس الإسود و من يومها و أنا تقريبا مش بلبس غيره
فى ثانوى كنت بحب الكيمياء بجنون و طبعا العربى ، مش عشان مدرس معين
لأ عشان نصوص الشعر اللى كنت بدرسها ، بالإضافة لإنى عندى هواية سرية جدا
أنا بحب أعرب القصائد و القصص اللى بقراها ، فالنحو مهم بالنسبة لى جدا
و طول عمرى بكره الإقتصاد و الجغرافيا
بس فى الجامعة مش عارفة إيه اللى حصل بينى و بين الإقتصاد ، بقيت بحبه بجنان لدرجة التلخيص من المراجع اللى فى مكتبة الكلية
حبيته لأنى اعتبرت إنى كمثقفة لازم أكون فاهمة إقتصاد كويس
كمان كنت بحب المحاسبة و الإدارة المالية جدا
كنتى عايزة تتطلعى ايه و انتى صغيرة ؟
زمان قوى لما كنت صغيرة الأفكار ماكانتش واضحة فى راسى عن المهن المختلفة و ايه اللى احب أكونه
بس فى كده فترة من حياتى لما كنت بفكر فى نفسى كنت بحس إنى قوية جدا و شجاعة جدا و إن مفيش حاجة ممكن تقف قدامى كنت بعتقد إنى ممكن أشتغل محاربة
زى زينا كده
الفترة دى كان عمرى فيها تقريبا 11 سنة
بعد كده هذبت شوية من أحلامى و اتمنيت أكون ظابط شرطة ميدانى ، يعنى أجرى ورا اللصوص و المجرمين و اضربهم بالنار
فى اعدادى اتمنيت اكون مدرسة رياضة ، عشان أكمل مسيرة أستاذى اللى مات
فى ثانوى بقى بدأت حفلات الجنون و الهيستريا
كل الأحلام العادية بتاعة المدرسين و الدكاترة دى راحت
كنت عايزة أدرس أدب فرنسى و بعدين قررت أدرس مسرح
بس ماما ماوافقتش ، فقررت إنى أعاقبها و أعاقب نفسى لأنى مقدرتش أدرس اللى بحبه
و كان العقاب كلية التجارة
درست و اتخرجت و اشتغلت محاسبة
بس دلوقتى بتمنى أدرس سينما
تحديدا مونتاج
إن شاء الله أبدأ مع بداية التيرم الدراسى الجديد
و كده أكون حققت أنضج أحلامى
****
طبعا أنا حولت التاج ـ كالعادة ـ لحالة حوار طويلة جدا مع نفسى و عن نفسى
و طبعا بشكر مصطفى جدا لأنه اتاحلى الفرصة دى لأنى اتكلم
و مش هامرر التاج لحد من مبدأ اللى اتأذى ميحبش يأذى حد
ولا ايه يا حضرة الظابط ؟

No comments: