Monday, March 26, 2007

26/3/2007


صورة اليوم

****

النهاردة يوم رائع بكل المقاييس
رائع لكل الطبالين و الرقاصين و المغنواتيه
يوم رائع لكل هواة لعبة الكراسى الموسيقية و غير الموسيقية
يوم رائع لمحبى نانسى عجرم عشان يسمعوها قدام كل لجنة استفتائية و هى بتغنى و بتقول لو سألتك إنت مصرى تقولى إيه
صحيح
لو أنا بقى اللى سألتك إنت مصرى هاتقولى إيه ؟
***
طبعا مصرى
و ابن مصر الله عليه
مصرى و ابن مصرى بتركب أتوبيسات هيئة النقل العام الصبح و بتتشعبط على السلم
مصرى و ابن مصرى بتاخد مرتب كل شهر ـ ده لو إنت بتشتغل يعنى ـ يكفيك لحد يوم 5 منه
مصرى و ابن مصرى بتاخد على فقاك كل يوم فى أى لجنة على الطريق من أصغر عسكرى أمن مركزى
مصرى و ابن مصرى و بيعدلولك دستورك عشان ينتهكوا حرمة بيتك و مكالماتك التليفونية و ايميلاتك الشخصية
مصرى و ابن مصرى
و ابن مصر الله عليه
***
من الصبح و أنا حاسة بصداع
و بضحك
عارفين الضحك بتاع شر البلية
هو ده بقى
الطريق من بيتى لشغلى فيه أكتر من 1000 لافتة تأييد
تأييد للتعديلات الدستورية
تأييد للحزب الحاكم
تأييد للحكومة و للرئيس
تأييد لأعضاء مجلس الشعب و الشورى و المجالس المحلية و رؤوس العائلات
تأييد للمؤيدين
تأييد للتأيد
ألاف اللافتات اللى فيها عشرات الألاف من المؤيدين اللى مش عارفين هما بيؤيدوا ايه ولا بيؤيدوا مين أصلا
و كمان مش عارفين مواد الدستور اللى هاتتعدل إيه بالظبط و هاتتعدل لإيه بالظبط
آلاف اللافتات اللى فيها عشرات الآلاف من المؤيدين لتعديل الدستور اللى هما مايعرفوش هو إيه بالظبط
ضحكت
و حقيقى شر البلية ما يضحك
***
فى المنطقة اللى أنا ساكنة فيهاو فى انتخابات مجلس الشعب اللى فاتت فاز عن الدايرة اتنين مرشحين واحد من الإخوان المسلمين و التانى مستقل
لكن مرشحى الحزب الحاكم مافازوش
المرشحين الخاسرين فى دايرتنا علقوا عشرات اللافتات على بيوتهم و مقارهم السابقة لتأييد التعديلات
و طبعا لتأييد الجزب الحاكم
بل إن واحد منهم جاب " دى جى " مخصوص عشان نانسى عجرم تحث ابناء الدائرة الكرام على حضور إستفتاء التعديلات الدستورية
ببساطة بيتملقوا للحزب الحاكم
بيقولولهم و النبى إحنا لسه رجالتكم حتى لو منجحناش
سلوك قذر و جدير بعاهرات و قوادى الحزب الحاكم
***
و اليوم خلص
و نسبة التصويت مازادتش عن 15% من إجمالى المقيدين بالجداول الإنتخابية
و طبعا هاتظهر نتيجة التصويت على إن نسبة 85%من إجمالى نسبة 15% وافقت على التعديلات الدستورية
و كده تبقى الموافقة بالأغلبية
***
مبروك عليكى يا مصر
مبروك عليكى دستورك اللى اتعدل بالأغلبية
***
و لسه بلبس إسود

2 comments:

الحصان الأسود said...

حلو كارت الاستفتائات دة يا ريم


واضح ان الحكومة طابعين منة 80 مليون كارت ويمكن اضعافهم لزوم اي انتخابات او استفتائات قادمة

اذا لم تستحي فاعل ما شئت

هوة مش استحياء دة كمان بقى بجاحة

اية يا فرعون فرعنك...... مالقيتش حد يلمني

Reem said...

عزيزى الحصان الأسود

لثانى مرة مرحبا بك فى مدونتى

****

حكومتنا العزيزة بالفعل طابعة ملايين الملايين من كارت الإستفتاء ده لكل الإستفتاءات اللى وردت أو إحتمال تورد فى حياتنا السياسية

هما بالفعل مابيستحوش

عشان كده مش لازم نتكسف إحنا كمان

لازم نعمل زى القصة القديمة و نقف نقول إن السلطان عريان من غير لبس

***

يا ترى نقدر ؟