Saturday, February 24, 2007

أنا منى كيف أحترس ؟


مخنوقة و تعبانة
داخلة على دور اكتئاب ـ بصراحة ـ مش عايزة أقاومه
حاسة إن الطريق قدامى طويل .. طويل
و أنا مش عارفة جاية من فين و كمان مش عارفة رايحة فين
كل اللى حساه تعب فظيع لدرجة إنى مش قادرة أحرك رجلى من على الأرض
الأسوأ من إنى مش قادرة ، إنى كمان مش عايزة
عايزة أفضل فى الحالة دى
تعبانة قوى
مخنوقة قوى
مرهقة قوى
كأنى بقالى 25 سنة بجرى و مش لاقيه حضن استريح فيه
عايزة أفضل كده
لحالى
مش عايزة أتحرك
أو اتكلم
أو حتى اسمع أى كلام من أى حد
نفسى أفضل كده لحد ماتجمد مكانى و أموت
مش عايزة أشوف حد و مش عايزة حد يشوفنى
خيالى المجنون بيجرى و أنا مش قادرة أوقفه
بشوفنى فى أوضاع دموية مرعبة
جسمى على الأرض و الدم بيخرج من كل مكان فيه
و خايفة
بحاول ماكونش خايفة بس مش عارفة
تعبانة من الإحساس اللى أنا حساه بس عاجبنى
مش شفقة على نفسى ولا حتى طالبة شفقة أو حب من حد
كل الأمر إنى مش قادرة أكون غير كده
مش قادرة أحب أى وضع تانى غير اللى أنا فيه
****
يا ربى ارحمنى منى
أنا تعبت قوى
****
يا رب أنا أضعف من إنك تسلط عليه نفسى
يا رب إرحمنى منى
****
تعبانة
و خايفة
****
مهجتى ضد يحاربنى*
أنا منى كيف أحترس

الأبيات للشاعر / نجيب سرور

4 comments:

Boba said...

عايزة اقول يمكن اني معرفكيش وانت كمان ما تعرفنيش
وان البلوج جه ادامي بالصدفة
بس والله انا فعلا حاسة بكل اللي بتقوليه
ونفسي اوي اسمعك
وعشان خاطر ربنا
بالراحة على نفسك
انا حاسة انك حد جميل اوي
مش يستاهل منك كل ده
ويا رب تقبليني اخت ليكي

Boba said...

اقولك على حاجة
انا اصلا لاقيت البلوج بتاعك
وانا بعمل سيرش عن صورة حد مخنوق
عشان بعمل بوست عندي
اني خلاص تعبت ومش عايزة اعرف حد تاني
لاني تعب من كتر ما اتصدمت في اللي عرفتهم
بس مش عارفة ليه علقت وقلتلك كده
تعالي بلوجي وانتي هتصدقيني

Reem said...

بوبا
وقتها أنا كنت فى أزمة .. بس الحمد لله و بفضله قدرت أتجاوزها

متشكرة قوى على رأيك فى و يا رب دايما أكون عند حسن ظنك

طبعا إحنا إخوات .. من اللحظة اللى كتبتى لى فيها و احنا بقينا إخوات

انتى كمان ماتقسيش على نفسك و لو احتاجتى اى شئ .. اى حد تفضفضى معاه .. انا موجودة

M.a.r.y.o.o.o.m said...

تخيلي عرفت مدونتك وانا بدور علي صور للإكتئاب والله لو تشوفي وشي دلوقتي بجد هصعب عليكي جداً انا كمان داخله علي الدور بتاعك بس بعيد عنك لما بيجيلي الدور ده بفقد الوعي تماما ببقي ماشيه عاملة زي التايهه في الشغل في البيت في الجامعه وفي كل مكان ربنا يلطف بينا