Thursday, February 15, 2007

أنا

الصورة دى هى أنا
هى مش صورتى ، بس هى أكتر صورة شفتها و حسيت إنها بتعبر عنى
شفتها لأول مرة فى مدونة صديق عزيز و من يومها و هى مش بتخرج من بالى
تحديدا دخلت قلبى و عقلى و ما خرجتش
الصورة فيها بنت جميلة و جذابة
تحديدا نقدر نقول أنثى جميلة و جذابة
و ده اللى أنا بشوفة فى عيون كل الناس اللى بيقابلونى
يمكن أنا مش شايفانى جميلة ، بس أكيد عارفة إنى جذابة جدا
شعرها إسود زى الليل ، تمام زى شعرى
لبسها إسود
و ده اللون اللى عمرى ما لبست ولا حبيت ألبس غيره
ليها جناحين فراشة
و الجناحين دول هما سر عذابى و تعبى فى 25 سنه عشتهم
دايما جناحاتى تاخدنى بعيد
و دايما بحس إنى مربوطة و متقيدة
زيها كده
زى خيالات الخيوط اللى بتربطها فى العمود اللى مش قادرة تطير بعيد عنه
عشان كده بحس إن الصورة دى بتعبر عنى
عشان كده بحس إنها أنا

1 comment:

Reem said...

بس برفع من روحى المعنوية


ريم